Shillong, Lber 3: U MP ka Rajya Sabha u Dr. Wanweiroy Kharlukhi u la ong ba ka imlang sahlang kaba leh klet lane ki isih ïa la ki khun samla ka dei ka bym don ia ka lawei ba phyrnai.
Haba ai jingkren ha ka jingialang pynkut ïa ka Youth Parliament kaba ar sngi ha Tura, u Dr Kharlukhi u la pynpaw ïa ka jingngeit skhem ba uwei napdeng ki nongïashim bynta ha kawei ka sngi un long ha ka lyngkor ha Meghalaya, da kaba bynrap, “U Blei u don la ki jong ki jingthmu na ka bynta uwei pa uwei u briew— to ïai ïaishah bad ïaineh.”
Haba pyrkhat, u la pynkynmaw ïa ka jingkyntait ïa ka jingtyrwa sha ka Rajya Sabha na u Late Purno A Sangma ha u snem 2008, nangta u la rung sha ka ïingdorbar ba ha khlieh duh ne Upper House hadien bun snem.
“Ka jinglong ka paw ha la ka jong ka por.”
U la kdew ba u Late Dr Donkupar Roy u dang dei u samla pule ha ka jylla ha u snem 1972 bad u la long Myntri Rangbah ka Jylla ha u snem 2008, bad ba u Myntri Rangbah ba mynta u Conrad K Sangma u dang shu dep pule college ha ka por ba la thaw ia ka NCP ha u snem 1999.
“Ki samla mynta ki dei ki nongialam ka lashai”, u la ong.
U Secretary ka Meghalaya Legislative Assembly, u Malthus S. Sangma, u la ïathuh ha ki samla pule ba ka jingïalehkai (exercise) kam dei shaphang ka “jingpynpaw ïa ki jingmut ha ka rukom kaba janai” hynrei ban peit bniah kumno ki nongmih khmat ki ïakren “namar ka jingieid ïa ka imlang sahlang.”
U la mynjur ia ka jingtieng ha ba kiew ha ki tynsan (stage) hynrei u la iaroh ia ka jingshlur jong ki.
La pynlong ïa kane ka prokram da ka tnat Political Science jong ka Tura Christian College bad la kyrshan ruh da ka Assembly, ha kaba la plie ïa kane ka prokram ha ka sngi Nyngkong da u Lamphang ka ïing dorbar thaw ain ka jylla u Thomas A. Sangma u la ïadonlang kum u kongsan.
