Shillong, Nailur 27: U Myntri ka tnat kam jngohkai ka jylla bah Paul Lyngdoh hynne ka sngi Balang, ula ong ba ka jing pyntreikam iaka Inner Line Permit (ILP) kan ym don jingktah iaka kam jngohkai pyrthei hapoh Meghalaya.
Ia kane u bah Paul ula kren sha ki lad pathai khubor hadien ka prokram bala pynlong daka Indian Responsible Tourism State Summit & Awards 2023 Meghalaya Chapter ha State Convention Centre Shillong.
Haba pyntip halor ka jingdon ki ain ban tehlakam iaka jingwan kyrthep ki briew hapoh ka ri Israel, u bah Paul ula ong kane ka ri ka kiew bha haka kam jngohkai pyrthei watla ka don daki ain ba khlain bad dei namar kane ka ILP ruh kan nym ktah satia iaka kam jngohkai pyrthei ha Meghalaya.
“Ka Ri Israel kadei ka ri kaba eh bha ban ioh rung daki briew ba nabar hynrei ka ioh ka kot ka kiew bha naka kam jngohkai pyrthei bad ka Israel ka dei ka ri kaba don hajrong ha baroh kawei ka pyrthei” la ong u bah Paul.
U bah Paul ula pyntip ba ki don haduh 15 lak ngut ki nongwan shangkai pyrthei na kylleng ka ri India bad na bar ri kiba la wan shapoh Meghalaya watla ka jylla kam don iaka Rel bad ka jingbym biang ka Kad Lengsuin hynrei kine ki nongwan shangkai kila wan hi daki kali.
Ha kane ka sngi u bah Paul ula pynkupburom iaki nongpyniaid iaki Guest House bad Homestay kiba don bynta ban kyntiew iaka kam jngohkai pyrthei hapoh ka jylla bad kine ki khusnam kidei bala mang daka Outlook Travellers bad ka tnat jngohkai pyrthei ka sorkar Meghalaya.
Iaki khusnam la bhah naduh ki Home-stays, Guest Houses, AirB&Bs, Travel Enterprises, Architecture, Food, Grassroot Heroes bad Cultural Ambassadors.
