Nongstoiñ, Naiwieng 20: Ka Hima Nongmynsaw kala pynpaw ia ka jingkmen halor ka jingtip ba ka Sorkar Jylla kan sa pyn kha ia ka Community & Rural Development (C&RD) Block ha Rimuliang haba pynpaw ruh ia ka jingsngewkhia halor ka jingmih ki jingpyrshah ban buh ia kane ka Block ha Nonglang.
Ka Ophis u Acting Syiem haba iakren bad ki nongthoh khubor myn sngi saitjain, kila pynpaw ia ka jingsngewkhia halor ka jingpaw kyrteng ka Hima ha ka jingkren ki riew rangbah lyngba ki lad pathai khubor, kiba dawa ban buh ia kane ka Block ha Tynghor ym ha Nonglang.
U Secretary ka Hima Bah Serbilin Lyngdoh ula pynshai ba ka Hima kam don bynta eiei ruh em ban iapyrshah ia ka jingplie ia kane ka Block.
“Ka Hima kam pat ju pyrkhat ban dawa ia ka Block hynrei ka Sorkar kala wan ban ai hi. Ka Hima ka sngewkmen palat bad ka pdiang sngewbha ia kane ka Block bad kumjuh ruh ia ka jingwan u Myntri Rangah ban buh ia u mawnongrim” ula ong.
Ha kajuh ka por, une u Nongialam ka Hima ula kyntu ia ki paidbah ba kim dei ban shah ialam bakla ne shah pynsngewthuh bakla ioh ba poi sha u pud ba ka Sorkar kan pynkynriah noh ia ka sha kiwei kiwei ki jaka.
