Shillong, K’lyngkot 16 : U Myntri Rangbah ka Jylla Conrad K Sangma ula pynksan ia ka jingpynlong ia ki Cabinet Retreat (ka jingialang Kynhun Myntri shabar ka Secretariat) da kaba ong ba kane ka dei ka jingkynshew (investment) ym ka jingpynsyrwa kai ia ka pisa, hapdeng ki jingkynnoh na ki Liang Pyrshah.
“Baroh kiei kiei ki dei ki jingpynlut, hynrei lada phi kylli ia nga, kane ka dei ka jingkynshew. Namar kata, phi lah ban peit ia ka na kawei pat ka jingiohi jong phi. Nga la iohi ba ki jingkynthoh pyrshah ki don beit, bad nga sngew ba ka long kongsan ia ngi ban iohi ia ka thong kaba kham heh” ong u Conrad haba iakren bad ki nongthoh khubor hashuwa ban sdang ka Cabinet Retreat kaba lai, kaba la iaid shakhmat ha ka sngi Thohdieng ha Orchid Resort, Mawkasiang, New Shillong Township bad kan kut lashai ka sngi Saitjain.
U Myntri Rangbah ula pynpaw ia ki jingmih jong ka Cabinet Retreat ba nyngkong haba ai nuksa ia ka jingai jingbatai ba bniah jong ka Tnad Pule Puthi halor ki nonghikai Adhoc bad SSA.
“Ha ka cabinet retreat ba nyngong, ka tnad Pule Puthi kala ai sha ngi ia ka jingbatai kaba jrong bha..ngi la iashong bad khmih iaki nombor, bad man ki Myntri Sorkar, man ki Ophisar kila iakhmih iakane, bad ngi la shim iaka rai ban pynbeit iakane ka jingeh ha u 2025” ong u Conrad.
U Conrad ula ong ba ki Retreat kila lam sha ka jingpynbeit ia ka kam jong ki nonghikai Adhoc bad SSA, bad ong “Ngi kmen bha ban pyntip sha phi ba ngi lah lah ban shim rai. Lada jin ba ka cabinet retreat kam long, lehse ngi lah ban nym pat lah pynbeit ia kane ka kam”.
U Myntri Rangbah ula ban jur ia ka jingkongsan kum kine ki Retreat bad ong “Nga ieh ha phi ban rai la kine ki jait kam ki long kongsan ne em”. Ula kyntu ia ki nongkynthoh pyrshah ba kin khmih ia kaei kaei kaba kham heh bad ki jingmih na kane ka retreat, ha ka jaka ban shu kynnoh ba dei ka jingpynsyrwa kai ia ka pisa”.
Nalor kane, u Conrad ula ong ba ka cabinet cetreat kaba lai kala sdang artad, da ka jingthmu ban pyniaid lang hajuh ia ka jingiohi jngai bad ka thong jong ki Tnad bapher bapher khnang ban lah kynjoh ia ka jingthmu kaba heh jong ka Jylla.
“Man ki cabinet retreat ki don la ki jong ki jong ki phang hynrei ka jingthmu ba kyllum lang ka long ban pyniahap lang bad ka jingiohi jngai kaba kham heh jong ka Sorkar Jylla bad ban sngewthuh ia kaei kaba ki Tnad bapher bapher ka Sorkar ki leh”.
U Myntri Rangbah ula batai ba ka retreat ka dei ka kabu ia ki Ophisar bad ki Minister ba kin sngewthuh ia ki prokram kam pynroi bad ki kam bapher bapher ba leh da ki Tnad bapher bapher ka Sorkar.
Ka retreat ka pynleit jingmut halor ki 10 tylli ki jingkut jingmut bad ki 10 tylli ki lad ki kabu bala buh ha ka State Vission 2008 bad Vission 2032.
“Ngi dang pyrshang ban batai ia ki paidbah ba katba ngi dang kynjoh bad katba ngi dang pyrshang ban kynjoh ia ka 10 million dollar economy bad 16 million dollar ha u 2032, kumno ka kam jngohkai ka shim ia ka bynta, kumno ka tnad PWD ka shim ia ka bynta” ong u Conrad.
U Myntri Rangbah ula ban jur ia ka jingkongsan ban don ka jingiatreilang bad ka jingiakren markhmat hapdeng ki Tnad bapher bapher. “Ki Ophisar ki long laitluid ban kylli ia kano kano ka jingkylli bad long laitluid ban ai ia kano kano ka jingmut. Ka long kum ka lad ha kaba ki Ophisar ki lah ban ai jingmut namar ki don ki khep ba ki jingai jingmut kiba biang eh ki wan na ki briew ba hapoh”.
 da kaba ong ba kane ka dei ka jingkynshew (investment) ym ka jingpynsyrwa kai ia ka pisa, hapdeng ki jingkynnoh na ki Liang Pyrshah.){kind=link}