Shillong, Nohprah 21 : U Nongialam ka BJP bad Myntri Sorkar Bah Sanbor Shullai hynne ka sngi Balang ula ong ba ka Bharatiya Janata Party (BJP) kan long kum u “Kulai Iong” (ka kynhun ka ban pynkyndit da ka jingioh khur ia ka jingjop) ha ka Elekshon MLA-2023.
Kat kum ka jingong jong u, ka BJP kan leh bha palat ia kaba khmih lynti khamtam ha Ri-lum Garo, da ka jingwan iasoh kiba bun ki MLA bad ki MDC barim.
“Ngin pynthikna ba ka dei ban don ka jingiakhun ba tyngeh hajan baroh ki Constituency bad hadien ngin sa thaw ia ka Sorkar bad ki Party ba iahap jingmut bad ngin pyniaid ia ka Jylla ha ka lynti kaba biang eh ka synshar khadar kat kum ka jingangnud jong u Myntri Rangbah Duh ka Ri Narendra Modi” ong u Bah Sanbor.
Haba kyntu ia ki paidbah ban “ailad shisien” ia ka BJP namar ba kila dep pyrshang lut ia baroh ki Party bad la dep iohi ruh ia u soh dalade, u Bah Sanbor ula ong “Lada ki paidbah ka Jylla ki lah ban aika lad ia kiwei ki Party, balei ba kim ai ia ka BJP”.
“Ki briew jong ngi kim dei ban ap bun snem ban pdiang ia ka BJP namar ki kabu ksiar kila nang tuid ei man ka sngi b aka BJP kam shym la don ha ka bor…Ngi dei ban sngewthuh ba ki MLA ka BJP ki dei ki Khun ka RI bad ki mihkhmat ia ka jingsngew, jingkyrmen bad jingthang jong ki paidbah ka Jylla hakhmat ka Sorkar Pdeng ba lamkhmat da ka BJP” ula bynrap.
Haba pynpaw ba kiba bun na ki nongkitkam ka BJP ki dei na ki Balang Khristan, u Bah Sanbor ula ong “U President ka Jylla Bah Ernest Mawrie bad MLA Bah AL Hek ki dei ki Catholic bad nga ba dei na ka Niam Tynrai nga mihkhmat ia ka Seng Khasi bad Sein Raij. U Bah Hek u dei uba iai buddien ban pynioh jaka na ka byna ban tei ia ka KJP Synod Building ha Delhi, U bah MAwrie ruh u dei uba ju kren bha ia ki jingeh jong ki balang Catholic hakhmat ki Nongialam na Delhi”.
Ula ong ba kane ka elekshon ban wan ka dei ban long halor ka mat ka roi ka par ym ha ki jingkynnoh ban pynpait pynpaw ia kaba ki paidbah kila iohi ba ka dei ka kam shukor pyrshah ia ka BJP da ki riewkhwan myntoi shimet.
“Kum kine ki jingkynnoh lamler kin sa mih beit, hynrei nga thikna ba ki nongthep vote kiba stad kin ym pdiang ia kine ki nongpynsaphriang lamler. Ha kane ka elekshon, to ngin iakren kumno ba ngin weng ia ki jingeh jong ki Nonghikai bad ki District Council, kumno ban pynthikna ba ki kam ba lait ha ka Sorkar kin dap noh, kumno ban pynthikna ia ka jingsuk, kumno ban weng noh ia ki jingeh ha khappud, kumno ban thawlad ha ka iohkam iohjam ha ki kompani shimet bad kiwei kiwei” ula ong haba kular ia ki nongthep vote ba tang ka BJP ka dei ka lynti ban iada ia ka hok jong ki paid riewlum, ban kyntiew ia ka ioh ka kot bad ban wanrah ia ka jingsuk ba shirta bad ka roi ka par.
