Agartala, Nailur 15 :U secretary ka CPI-M ka jylla, u Jitendra Chowdhury hynnin ka sngi balang ula kynthoh tyngeh pyrshah ia ka sorkar synshar BJP da kaba kynnoh ba u budlum jong ka ioh ka kot ka jylla ula shah pynjulor noh ha kane ka party synshar.
“Ka pisa u paidbah kala shah lute noh ha ka sorkar bamsap ka BJP.Ka spah ka phew jong ki nongmihkhmat ka BJP kala nangkiew bun shah naduh kine ki khyndiat snem ba la dep.Naei kane ka pisa ka wan? Ka pisa kaba thmu na ka bynta ka bha ka miat bad ka roi ka par jong u paidbah kala rung sha ki dkhot nongmihkhmat jong ka Bharatiya Janata Party”, kam u Chowdhury.
Ia kane une u nongialam ka CPI-M ula kren ha ka jingialang paidbah kaba la long ha Bamutia.Katkum u Chowdhury, namar ka jingpynlong ia ka ilekshon kala hajan, kumta ruh ki nongialam ba halor ka BJP sa shisien pat kin wan poi ha kane ka jylla na ka bynta ban banbor bad ban ialam bakla ia u paidbah.
“Ngin sa iohi ia ka kynhun ki nongialam kiba wan her na Delhi ban thok ban shukor ia phi kumba kila leh ha ka por ba la pynlong ia ka ilekshon assembly ha ka snem 2018. Kin pan ia ki vote ki jong phi sa shisien pat, hynrei ha kane ka kynti kaba mynta ki paidbah ka jylla kila kham shemphang shibun.Kila sngewthuh bha ia ki kam sain hima sima jong ka BJP,” kam utei u nongialam ka CPI-M.
Da kaba kam ba ka sorkar synrop bala ialam da ka BJP kala pulom ban pynurlong ia ki jingkular ki jong ki, u Chowdhury ula ong; “Ba ka sorkar ar engin (double-engine government ) kam shym la lah satia ban pynurlong ia ki jingkular ki jong ka.Jin da la kila pyntreikam ia kine ki jingkular, kin jin da la ioh pdiang ia ka jingshaniah na ki paidbah khlem da donkam ia ki jingkyrshan lyngba ki kynhun runar kiba kala pyndonkam.
“Katba ki sngi sha ka ilekshon kila nang jan, ka jingjur jong ki kam pyntriem pyrshah ia ki nongtrei jong ki liang pyrshah kala nangkiew arsut. Hynrei, Nga kwah ban pyntip ia ka BJP ba ki paidbah kila long kiba kloi ban ai ia ka jubab kaba biang na ka bynta jong ki ha kane ka ilekshon ka ban wan,” ong shuh shuh utei u nongialam ka CPI-M.
