Gangtok, Rymphang 23: Ka Sikkim kala sakhi ia ka jinghap slap bad ka ior ha ki jaka lum jong ka Jylla khamtam ha shilynter ka Changu–Nathula ha East Sikkim hadien ka jing tyrkhong ka bym ju kham jia ha u bnai Kyllalyngkot bad Rymphang.
Katkum ki khubor, ka jinghap slap ka la long tang ha North bad East Sikkim, katba ka West Sikkim ka dang bteng ban mad ïa ka jingtyrkhong.
Ka jingtyrkhong kaba la slem ka la ktah jur ia ka jingioh um ha ka nongbah. Ki tyllong um ba kongsan jong ka Gangtok, ka Ratey Chhu—kaba don kumba 17 km shaphang shatei lam mihngi jong ka nongbah—ka la sakhi ïa ka jinghiar ka jing pynbiang um haduh 60 percent haba ïanujor bad u bnai Nailur, kaba la wanrah ïa ka jingsngewkhia halor ka jingkyrduh um ha ka thaiñ kaba bun nongshongshnong.
Ka India Meteorological Department (IMD), ka la pynmih ia ar tylli ki yellow alert na ka bynta ka janmiet sngi u Blei, ha kaba la antad ba kan don ka jingpom pyrthat bad ka leilieh ryngkat bad ka jinghap slap ne ka ior ha ki distrik Pakyong, Gangtok bad Mangan.
Ka North bad East Sikkim ka lah ban ioh ia ka jinghap slap haduh ka 24 tarik u Rymphang, ha kaba la khmih lynti ba kan don ka jinghap slap ha South Sikkim ruh kumjuh. Ka distrik Mangan ka lah ban ioh ia ka jinghap slap haduh ka 27 tarik u Rymphang, la ong ka IMD.
