Tura, June 14: Ka Garo Students Union kala kyntu iaka Expert Committee jongka State Reservation Policy ba kadei ban pynneh beit kumba ka long ia ka Srate Reservation Policy bad pynpaw ba ka jingbteng ban ym khein kongsan ia ka jaidbynriew Garo kala pynlong ruh wat ia ka Meghalaya High Court ba kan tuklar bad hukum ia ka sorkar jylla ban pyntreikam ia ka Roster System halor ka jingthungkam thungjam hadien 52 snem tam.
Ha ka shithi kaba la phah sha u Bah L K Diengdoh, Secretary ka Expert Committee halor ka State Reservation Policy, u President ka GSU u Tengsak G Momin ula kdew ba ka jaidbynriew Garo kala shah kheiñ kum ka bym kongsan ha kata ka kyrdan ban ioh ia ka lad ka kabu, la ka long ha ka pule puthi, ka ioh ka kot bad ka hok ban mihkhmat ha ki kam sorkar.
Ula pynkynmaw ia ka committee ha kaba iadei bad ka kaiphod jong ka khana samari kaba iadei bad ka jingdon ki nongtrei ha ki kam Sorkar, kaba la pynmih ha u snem 2022, kaba la pyni shai ba kala don ka jingleh shilliang khmat ha kaba haduh 15,157 kaba dang dei ban ioh kam da ki jaidbynriew Garo.
Kala pynpaw ruh ba ka jingdawa ban pynbeit thymmai ia ka policy ka dei tang ka jingthmu ban ioh ia ka bhah kaba heh da ka jingiatylli lang jong ki jaidbynriew Khasi-Jaintia, kiba la ioh bhah lypa ha ka liang ka pule puthi, ki lad kamai.
Ka Garo Students Union kala ong ba ka long kaba donkam ban thung pyndap shwa ia palat 15,000 ki kam kaba dei ka hok ban leit sha ki Garo.
U President ka GSU ula ong ba ka jingdawa ban pynbeit thymmai iaka Job Reservation Policy 1972 ka dei ka jingleh politik na ka bynta ban don ia ka jingniew bein ia kawei pat ka jaidbynriew ban ioh lang kumjuh ia ka bhah namar ba ia katei ka state policy la pynshong nongrim da ka jingbhah lang kumjuh na ka bynta ka bha ka miat bad ka jingmyntoi jong ki 3 tylli ki jaidbynriew ka jylla.
“Ka jingdawa ban pynbeit thymma ia ka state policy kam dei kaba la wanrah da ka jaidbynriew kaba la shah pynduh ia ka hok ha ka jylla hynrei da ka kam sainpyrthei kaba buittuh jong ka seng saiñ pyrthei na kabynta ban kiew ha ka kam saiñ hima bad jingiohnong lyngba ka jingdawa ba ka don ka jingbhah kaba noh shilliang watla ki jaidbynriew Garo kila mad ia ka jingduhnong bad kajingbym iohlad. Kumta ia katei ka jingdawa dei ban shim kum ka jingshim tang tiak ia ka mluh namar ba kam dei satia ka jingioh nong ia baroh ki ST hynrei kadei beit tang ka jingiohnong jong ki katto katne” ong u President ka GSU.
“Ki Garos ki kyntait ruh ban pynbeit thymmai ia ka JRP da kaba pynshong nongrim katkum ka jingbun paid namar ba ia ka policy la pynshong nongrim da ka jingthmu ban iada bad pyntreikam ia ka hok ba nsam mar katjuh ia ki lad, ka jingmihkhmat bad ia kiwei pat ki hok kumba la kdew ha ka policy” ula ong.
Ka Garo Students Union kala pynshai ruh ba ka don ka jingshim rai kaba tylli lang hapdeng ki Garo ban pyrshah ia ka jingkhmih bniah biang ia ka policy khamtam ia ka jingbhah 40% ia ki Garo bad ban pynkiew ia ka 40% ka jingbhah ia ki Khasi-Jaintia.
“Ngi iengskhem ba dei ban pynneh kumba ka long ne ‘Status Quo’ bad ia ka JRP 1972 ym dei ban khmih bniah ne pynbeit thymmai” la dawa ka GSU.
