Shillong, Jylliew 14: Ka Federation of Riwar Mihngi Local Dorbar hynne ka sngi Thohdieng, kala leit pynsngew sha u Symbud Myntri Rangbah ka Jylla Bah Prestone Tynsong uba dei ruh u MLA ka Pynursla, halor ka jingshah pyndik ki paidbah haki shipai BSF bad ki bor Pulit.
Haba kren sha ki lad pathai khubor, u President ka Federation Bah Joy James Roy Khongmawloh ula iathuh baka Federation kala ioh khubor naka por shaka por ba ka don ka jingshah pyndik ki paidbah haki thain khappud haki shipai BSF bad ki Pulit ka Jylla.
Ula iathuh ba dang shen ka don ka jingshah thombor ki paidbah ba thep kwai haki BSF bad haka 11 tarik mynta u bnai ki Pulit ka Dawki Police Station kila phah dait da u ksew ia uwei u rangbah ba shah kem halor ka jingkynnoh ba udei nong Bangladesh.
“Ka jingleh jong ki pulit jong ka Dawki Police Station pyrshah ia une u rangbah ka long ka bym ïahap bad ka bym lah ban pdiang satia bad na ka liang ka Federation ka pynrem jur halor kane ka jingleh riewkhlaw jong ki” ong u Bah Joy.
U Bah Joy ula iathuh ba u Symbud Myntri Rangbah ula pyntip ba ka Sorkar Jylla kala iakren bad ki BSF ba kidei ban long adkar ha ka ban pynibor iaki paidbah haki thain khappud.
Ka Federation of Riwar Mihngi Local Dorbar kala pan ruh ka jingiarap na u Bah Prestone ban lah pyndep noh iaka iingdorbar jong ka Federation kaba la dap 30 snem, ban peit lem bad ban phah maramot iaki surok bad iaka jingkieng ban leit shaka shnong Nohwet bad ban kyntiew bad pynbha iaka CHC Pynursla.
