Nongpoh, Jymmang 20 : Ka seng Confederation of Ri-Bhoi People (CoRP) hynne ka sngi Nyngkong, kala pynlong ia ka jingtalasi ia ki kali ba kit nongbylla bar jylla ha Byrnihat namar ka jingjur ka jingartatien ia ka jingtreikam hok jong ki Pulit ba ap ia ka Infiltration Check Gate, kaba don ha Byrnihat, Ri-Bhoi District.
Ka CoRP hapoh ka jingialam u President Bah Bandari Ryntathiang, kala shim ia kane ka sienjam halor ka jingioh bat man ka por ia ki nongbylla bar jylla kiba la wan rung sha Jylla Meghalaya khlem ki kot ki sla ban pyni ba ki dei ki nong India kynthup ruh ia ka Labour Licence/Work Permit.
U Bah Bandari ula pyntip ba ka seng ka sngewkhia jur bha halor ka jingbym lah jong ka Tnad Infiltration ban tehlakam ia ka jingrung beain ki bar jylla ba khlem kot khlem sla shapoh ka Jylla.
U pyntip ba dang shen ka seng kala ioh ban bat da ki spah ngut ki nongbylla bar Jylla hajan ka Flyover, Umiam hadien ka jingioh rung lyngba ka Infiltration Check Gate, Byrnihat. U iathuh ba ha ka jingtalasi, la shem ba kine ki bar jylla kim don satia ia ki kot ki sla kaba pynartatien shikatdei eh iaka jingtrei hok jong ka Infiltration Check Gate.
