Shillong, Rymphang 09: U Myntri Rangbah ka Jylla Conrad K Sangma ula ong ba ka Sorkar ka kloi ban pynbteng ia ka jing iakren iasul ba lai liang mamla (tripartite) bad ka seng Hynniewtrep National Liberation Council (HNLC) ka kloi ban bud ia ki kyndon bala buh da ka Ministry of Home Affairs (MHA).
“Ka jingiakren ka lah ban long lada ka seng (HNLC) ka kloi ban bud ia ki kyndon bala buh da ka Ministry of Home Affairs, ka Sorkar India” ong u Myntri Rangbah.
Ula pyntip ba ka Sorkar Jylla kala ieng ha ka nongrim ba ki don ki kyndon bala buh da ka MHA bad ka jingiakren ka lah ban long satang lada ka seng ka bud ia kine ki kyndon.
“Ngim lah ban iaid lait na kata namar kane ka dei kaba la buh ia baroh ki jingiakren iasuk” ula ong haba pynpaw b aka MHA kam lah ban pyndonkam da kiwei ki kyndon ia kiwei pat ki seng.
Jalor ka jingpdiang ka HNLC ban iakynduh bad shong iakren, kaba la pynpaw pyrthei ha ka social media, u Myntri Rangbah ula ong “Ngim pat ioh pdiang eiei satia kaban long da ka jingthoh na ka HNLC”.
Haba iai ban ba ka Sorkar ka kloi ban iakren bad ka seng, ula ong “…ngi (Sorkar Jylla) kwah ia ka jingsuk ba neh slem bad iai ban ba ki (HNLC) dei ban wan shakhmat ban iakren biang”.
Halor ka jingweng noh ia ki case pyrshah ia ki nongialam bad ki dkhot ka HNLC, u Myntri Rangbah ula ong ba ka jingweng noh ia ki case pyrshah ia ki nongialam ne dkhot ka HNLC kan shong kat kum ka jinglong jong kawei pa kawei ka case.
Lah ban kdew hangne ba ka HNLC lyngba ka General Secretary cum-Publicity Secretary Bah Sainkupar Nongtraw, kala buh jingthoh ha Facebook ba pyntip ba kala phah ktien sha u Symbud Myntri Rangbah ka Jylla Bah Prestone Tynsong ba ka seng ka pdiang ia ka jingtyrwa ka Sorkar ban iakynduh bad iakren hynrei kan long pat halor ki kyndon jong ka HNLC.
La ong ba ka HNLC kan sa pynbeit hi ma ka ia ka jaka ban iakynduh bad lada dei ha kawei pat ka ri, kan sa pynbiang ia ka lynti iaid kaba shngain. U Symbud Myntri Rangbah um dei ban don ka jingartatien ia kane ka bynta.
 bad ka seng Hynniewtrep National Liberation Council (HNLC) ka kloi ban bud ia ki kyndon bala buh da ka Ministry of Home Affairs (MHA).){kind=link}