Shillong, Nailur 12 : U MLA ba lai samoi ka NPP na Raksamgre Limison D Sangma, ha ka sngi Thoh dieng, ula shah jied khlem ka jingialeh pyrshah kum u Deputy Speaker ba thymmai ka Iingdorbar Thaw Ain ka Jylla.
Haba pynbna ia kane na ka shuki, u Lamphang Thomas A Sangma ula ong “Namar tang kawei ka kyrteng la ioh pdiang bad shem ba ka biang nadong hadong, kumta nga pynbna ia u Limison D Sangma ba ula shah jied kum u Dy Speaker ka Iingdorbar Thaw Ain ka Jylla”.
Hadien kane, ia u Limison la synran da u Myntri Rangbah ka Jylla Conrad K Sangma bad u Nongia lam ka Liang Pyrshah Mukul Sangma ban shimti ia ka shuki, kaba dei ka sngi sdang jong u ia ka kam ba thymmai.
Baroh 4 ngut ki MLA ka Voice of the People Party (VPP) kynthup u MLA ka Nongkrem Ardent Miller Basaiawmoit, MLA ka Mawlai Brightstarwell Marbaniang, MLA ka Mawryngkneng Heavingstone Kharpran bad MLA ka North Shillong Adelbert Nongrum kila jah rngai bad khlem iashimbynta ha ka jingpdiang burom ia u Dy Speaker ba thymmai.
U Lamphang ula pdiang sngewbha ia u Limison bad pynpaw ia ka jingkmen lang jong baroh halor ka jingshah jied jong u.
U Limison ula pynpaw ia ka jingsngewnguh bad sngewrit halor kane ka jingshah jied khlem kano kano ka jingialeh pyrshah kum u Dy Speaker.
“Nga la ioh jinghikai ba ka jinglong nongialam ba shisha kam dei eh ban bat ia ka bor hynrei ban shakri ia ki paidbah da ka jingsngew rit bad jingtrei hok” ula ong haba ai khublei ia ki paidbah ka Raksamgre, ka party bad ia u Myntri Rangbah halor ka jingkyrshan bad ka jingbtin lynti.
Haba ai jingkren pdiang burom, u Myntri Rangbah Conrad K Sangma ula ai khublei ia une u Dy Speaker ba thymmai bad pynpaw ia ka jingsngew skhem ia ka jinglah jong u ban ialam bha ia ka Iingdorbar.
Ula kubur ba ki jingiatai ha Iingdorbar ki lah ban khluit bha hynrei ula ban jur ba kine ki jingiatai ki dei kiba mih na ka jingthrang ban shakri ia ki paidbah, ym ban myntoi shimet.
U Nongialam ka Liang Pyrshah Mukul Sangma ula ai khublei ia une u Dy Speaker thymmai bad pynpaw ia ka jingkmen kaba khraw ia ka jingshah jied jong u khlem ka jingialeh pyrshah.
