Shillong, Jylliew 20 :U MDC bala jop 2 samoi na Sohryngkham Bah Pyniaid Sing Syiem hynne ka sngi Ba-ar, ula shah jied khlem kano kano ka jingialeh pyrshah ban shimti ia ka shuki kum u Chief Executive Committee (CEM) ba thymmai ka Khasi Hills Autonomous District Council (KHADC).
Ia kane ka elekshon CEM la pynlong hadien ba ka Executive Committee ba 4 snem jong ka United Democratic Alliance (UDA) ba ialam da u Bah Titosstarwell Chyne, kala khyllem noh ha ka No-Confidence Motion bala wanrah da u MDC ka NPP na Rambrai-Jyrngam Bajop Pyngrope bad bala kyrshan da ka Congress ha ka sngi sdang jong ka Dorbar Lyiur ka Council ha ka sngi Nyngkong.
Ka NPP bad ka Congress kila thaw ruh ia ka kynhun synrop Khasi Hills Democratic Front (KHDF) ban thaw ia ka Executive Committee ba thymmai hapoh KHADC kaba don haduh 18 ngut ki MDC.
Ia u Bah pyniaid la pyndonburom da ki Dkhot ka Iingdorbar ba kynthup na ka Liang Synshar bad Liang Pyrshah ha ka sngi ba-ar jong ka Dorbar Lyiur.
Haba ai jingkren, une u CEM ba thymmai ula kular ba ka Executive Committee ka KHDF ba ialam da ka NPP, kan pynthikna ia ka jingtreikam haba shit haba shai bad ba biang ka jingkhein jingdiah ha ka jingtreikam jong ka Council.
Ula pynpaw ruh ia ka jingbym sngewiahap ia ka jingkren u CEM bala leit noh Bah Titosstarwell Chyne ba ong ba ym dei ban shaniah iano iano ruh bad ong “Khlem ka jingshaniah ngin ym lah ban treikam. Namar kata, nga pynpaw ia ka jingshaniah ba 101% ha ka EC ba thymmai bad nga kyntu ia baroh ki Dkhot ba kin ai ka jingkyrshan ba pura bad ban iatreilang bad ngi”.
Haba kren halor ki mat treikam ba hakhmat, u Bah Pyniaid ula ong ba ka EC thymmai kala kut jingmut ban shimkhia ia ka ishu ba iadei bad ka jingtyrwa pynkylla thymmai ia ka Sixth Schedule ka Riti Synshar ka Ri, ka jingpynrung ia ka Ktien Khasi ha ka khyrnit ba phra, ka pla iarong tyngka ba khlain jong ka Council, ka jingiakajia pud bad kiwei kiwei.
“Ngi la shimti ia ka EC ba thymmai da ka jingkitkhlieh ba pura bad ngi pynthikna ban buh ia ka bha ka miat jong ka Council hakhmat eh khamtam halor ka sienjam bala shim da ka Ministry of Home Affairs ban wanrah ia ka jingpynkylla thymmai ia ka Sixth Schedule. Ngin iai bteng ban buddien ia ka kam bad ka Sorkar Jylla lem bad ka Sorkar Pdeng khnang ba ngin ban nang ai ia ki jingai jingmut. Ngin sa buddien ruh ia ka Kten Khasi ban pynrung ha ka Khyrnit ba phra kham kloi kat kaba lah. Kane kan urlong lada baroh ki shim lang ia ka jingkitkhlieh ha kaban iatynruh” ula ong.
Halor ka iakajia pud, u Bah Pyniaid ula iaroh ia ka jingshimkhia jong ka Sorkar MDA ba ialam da ka NPP ban pyndep ia ka kylla ba nyngkong jong ka jingiakren ban pynbeit ia ki jingiakajia ha ki hynriew tylli ki jaka iakajia bad ka Assam bad ban sdang ia ka kylla kaba ar ban pynbeit pat sa ia ki hynriew tylli ki jaka iakajia ba dang sah.
Une u CEM ba thymmai ula pyntip hapoh ka IIng halor ka jingiakren phone jong u bad u CEM ka Karbi Anglong Autonomous Council (KAAC) bad ong “Nga la kyrpad ia ki (CEM ka KAAC) ban pynthikna ba kam dei ban don ka jingthom bor ia ki paid Khasi kiba sah ha ki thain Raid Nongtung kaba don ha khappud. Ngi la kut jingmut ban weng noh ia ki jingeh jong ki paidbah kiba sah ha khappud”.
Nalor kane, u Bah Pyniaid ula kular ba ka EC ba thymmai kan s ashim ruh ia ka sienjam ban pynkhlain ia ka jingpynmih pisa jong ka Council bad ban pynthikna ba ki palat 800 ngut ki nongtrei, kim dei ban duh ia ka tulop.
“Ngi la pynlut haduh T. 4 klur shibnai bad T.50 klur shisnem tang ha ka jingsiew tulop bad shiteng na kane ka pisa kala wan na ka jingpynmih pisa hi ka Council ba kynthup na ka khajna Professional Rax, ki jingsiew bapher bapher bad kiwei kiwei” ula ong.
Kat kum ka jingong jon gu, kiwei pat ki lad pynmih pisa jong ka Concil ki wan na ki bhah khajna na ki marpoh khyndew khamtam u dewiong bad ka bhah na ki khajna kali.
Haba iadei bad ki Bill ba sahteng bala mynjur da ka Council, une u CEM ba thymmai ula ong ba ka EC ba thymmai kan sa ialam ia ka kynhun ban iakynduh ia u Symbud Myntri Rangbah ba khmih ia ka District Council Affairs (DCA) Bah Prestone Tynsong, ban iabuddien halor kine ki Bill ba sahteng kiba kynthup ruh ia ka Clan Bill.
U Bah Pyniaid ula ai khublei ruh ia ka Sorkar halor ka jingthaw ia ka Expert Committee bad ong “Ngi kwah ruh ba kane ka Committee kan nang pynrung dkhat shuh shuh ia ki briew, kiba tip bha shaphang ka issu, khnang ba ki Bill bala mynjur da ka KHADC kin ioh noh ia ka jingmynjur u Lat kham kloi kat kaba lah”.
Pule lang ia kane: Ujor ki Sengbhalang ban ratdyngkhong ia ki karkhana dieng ba be-ain
