Shillong, Jymmang 06: U Lurshai Nongrang u samla pule ka Seng Khasi College lem bad ka kynhun ka Shillong College, ki la ioh ban rah ia ka nam kum ki lahduh ha ka rynsan iakob rwai ba la pynlong da ka Seng Khasi College, kum shi bynta ka jingrakhe ia ka Jubili Ksiar jong ka College.
Ia kane ka jingiakob la pynlong ia ka hynne ka sngi ka 6 tarik u Jymmang 2023, ha Seng Khasi Higher Secondary School Hall, Jaiaw, Shillong.
Ka jingdon ki nongwan iashim bynta ha ha ka iakob rwai kynhun la don haduh 9 tylli ki College bad ha ka iakob rwai ba para marwei la kiew rynsan da 12 ngut ki samla.
U Lurshai u la ioh ban rah ia ka nam lahduh ha ka iakob rwai ba para marwei bad i ba wan ba-ar bad ba-lai ki long Venetia K. Warshong ka St Anthony’s College bad Sweety Mary Lyngba ka St Mary’s College.
Haba phai pat sha ka iakob rwai kynhun, ka College ba la rah ia ka nam lahduh dei ka kynhun ki nongrwai jong ka Shillong College, ba wan ba-ar bad ba-lai ki long ka St Edmunds College bad ka kynhun jong ka St Mary’s College.
Ki lai nguit ki nongbishar (judges) ba la wan ban ia bishar ia kane ka jingiakob ka kynthup ia bah Rudy Wahlang, u Hubert Malngiang bad ka samla nongrwai ba la paw ka jylla ka Adollerine Sawian.
