Jop ka phlim ‘Ha Lyngkha Bneng’ u Bah Pradeep Kurbah ha ka 47th Moscow International Film Festival

Shillong, Iaiong 25: “Kane kadei na ka bynta ka jylla Meghalaya—na ka bynta ki paidbah, ki khana bad ia ka mynsiem jong ka. Ka jingkyrshan ia ki cinema ha ka jylla ka dei kaei kaei kaba ai mynsiem ia ngi ban don ia ka jingangnud, ban shim ia ki sienjam kiba eh bad ban iai bteng ban iathuh ia ki khana kaba long kaba kongsan. Kane ka khusnam kadei ruh na ka bynta ka jong phi” ong u nongshna phlim ba pawnam ka Meghalaya, u Bah Pradip Kurbah, hadien ka jingjop ia ka khusnam ‘Best Film’ bad ‘Best Director’ ha ka 47th Moscow International Film Festival na ka bynta ka phlim “Ha Lyngkha Bneng”.

Kane ka jingioh pdiang artylli ki khusnam kala long ka khyllipmat kaba kongsan na ka bynta ki kam pynmih phlim ha ka ri India bad ha ka thain, kaba la wanrah ia ka jingphaikhmat jong kylleng ki ri ia ki khana kiba la mih na ka thain shatei lam mihngi.

Ka Moscow International Film Festival (MIFF) kadei kawei na ki rynsan phlim kaba la rim tam ha ka pyrthei (ka Baar hadien jong ka Venice Film Festival). Ka Moscow International Film Festival kadei kaba la pawnam naduh ba la sdang ia ka ha u snem 1935. La pynlong ia ka Film Festival kaba nyngkong eh hapoh ka jingialam u Chairman barim jong ka Jury u Sergey Eisenstein bad la plie ia kane ka film festival da ka jingpyni ia ka phlim Chapaev.

Hynrei hadien kane, ym shim la pynlong tista ia kane ka festival, kumta la niew ia ka Moscow International Film Festival ba kala sdang naduh u snem 1959, ha kaba la pynthymmai bad la pynlong thikna ia ka man la ka snem.

La pynlong ia ka 47th MIFF ban kyntiew ha ka jingsam mar kylliang ha kaba iadei bad ka kolshor hapdeng ki ri bad ban kyntiew ia ka jingdon ia ka jingiadei hapdeng ki nongshna phlim jong kane ka pyrthei.

Haba pynpaw ha ka rynsan social media halor kane ka jingkmen, u Bah Pradip Kurbah ula ong, “Nga dap da ka jingsngewkmen bad jingsngewrit ryngkat lang bad ka jingsngewnguh, ‘Ha Lyngkha Bneng’ kala ioh ia ka khusnam Best Film bad Best Director… Ban ong kane ka long kum ka jingpynurlong ia ka jingangnud, hynrei ka dang long kaba duna pat ia kaei kaba nga sngew ia mynta hi”.

Ula pynpaw ia ka jingsngewnguh ia ki Jury bad ia ki nongpyniaid ia kane ka festival.
U Bah Kurbah ula pynpaw ba kumno kane ka jingioh jingithuh na ka pyrthei, kala wanrah ia ka khana na ki lum jong ka jylla Meghalaya sha kane ka rynsan jong ka pyrthei.
“Ka jingai jingithuh ka jong phi kala pynlah ban wanrah ia kane ka khana na ki lum jong ka Meghalaya sha ka pyrthei” ula ong.

U Bah Pradip Kurbah ula ai khublei bad sngewnguh ia ka kynhun baroh kawei, kaba kynthup ia ki tyngshop ki puron, ki technician bad ki dkhot baroh bad ula ong ba ki long kum u klongsnam jongka Ha Lyngkha Bneng.”
Ula ai khublei ruh ia baroh kiba la kyrshan ia u da kaba phah ia ki message, buh jingduwai bad ka jingbha ka jongki.