Shillong, Nailur 06: U Donlad Diengdoh ula thep ia ka hat-trick na ka bynta ka Langsning ha kaba kila lah ban pynrem syndon ia ka Sawmer da 6-0 ha ka jingiakhun ha ka Shillong Premier League 2025 ha SSA Stadium, First Ground, Polo, ha ka sngi Thohdieng.
U Donlad Diengdoh ula ioh ia ka hat-trick da kaba thep 3 tylli ki kol ha ka 41, 44′ bad 59 minit, katba u Nikelson Bina ula thep ia ka kol lyngba ka Penalty ha ka minit kaba 13, u Richie Kharbani ula thep ia ka kol ha ka 66 minit bad u Medingroy Makdoh ula thep ia kol ha ka 89 minit.
Ka Sawmer nalor ka jingshah thep kol kala mad ruh ia ka jingshah beh noh jong uwei u nongialehkai na ka madan.
Kane ka jingjop kala pynlong ia ka Langsning ban don mynta ha ka kyrdan ka baar da kaba kamai 7 point kaba ia ryngkat bad ka Shillong Lajong hynrei kala don pat ka jingiapher ha ka jingioh thep kol.
Kane ka jingshah thep bun kol kala pynlong syndon ia ka Sawmer ban don noh ha ka jaka ban shah pynhiar kyrdan bad kumba long mynta ka don ha ka kyrdan kaba 9 namar ka jingiapher ha ka jingshah thep kol.
Ka Sawmer kala ioh 3 point bad kala ia ryngkat bad ka Laitkor bad Malki hynrei ka jingiapher ka long ba ka Sawmer kala shah thep bun kol eh ban ia kine ki ar tylli ki kynhun.
Ka jingiakhun ha ka sngi Saitjain kan long hapdeng ka Nongrim Hills pyrshah ia ka Laitkor ha ka por 4:30 nohphai sngi.
