New Delhi, Risaw 22: Ka shnong Khliehrangnah, West Jaintia Hills, kala wan balai ha ka Best Village Panchayat jongka 5th National Water Awards, 2023.
Ia katei ka khusnam la aiti da u Myntri ka tnad Jal Shakti u CR Patil, katba ka President ka ri ka Droupadi Murmu, kala plie ia ka jingialang kaba la long ha Vigyan Bhawan, New Delhi kaba la pynlong da ka Ministry of Jal Shakti, Department of Water Resources, River Development and Ganga Rejuvenation na ka bynta ki kyrdan bapher ha kaba iadei bad ka Water Resources Conservation & Management.
Ia kitei ki khusnam la sam sha ki 38 ngut ki nongjop ha ki 9 tylli ki kyrdan kiba kynthup ia ka khusnam Best State, Best District, Best Village Panchayat, Best Urban Local Body, Best Water User Association bad Best Civil Society.
U Myntri Rangbah ka jylla u Conrad K Sangma, ula pynpaw ia ka jingsngew sarong ban ai khublei ia ka shnong Khliehrangnah, West Jaintia Hills, kaba la wan balai ha ka jingioh khusnam ha ka National Water Awards 2023 ha ka Best Village Panchayat.
Ia kane ka khusnam la ioh namar ka jingtrei shitom jong ka shnong ka thaw kiba ialeh ban pynneh pynsah ia ka um ka wah bad ka jingskhem jingmutka sorkar ban pynthikna ba ki jingdon jingem la pyndonkam ha ka rukom kaba dei bad kaba don ia ka jingkitkhlieh. Katei ka jingiatreilang hapdeng ka sorkar bad ka shnong kan kyntiew ia ka jinglong jingman jong ka sawdong sawkun bad ban kyntiew ia ka jingpynneh pynsah.
Ia katei ka khusnam la leit ban shimti da u Bah Lamluti Langstang, u Rangbah Shnong ka Khliehrangnah, West Jaintia Hills bad u Gunanka DB, IFS, Executive Director, MBMA.
Ha ka shnong Khliehrangnah la leh ia ka project hapoh jongka Community-Led Landscape Management Project (CLLMP), kaba la bei tyngka da ka World Bank bad pyntreikam da ka Meghalaya Basin Management Agency (MBMA).
Kane ka jingioh khusnam ka pyni ia ka jingjop ha ka jingpyntreikam ia ka CLLMP project ban kyntiew ia ki shnong ki thaw kiba shim ia ki sienjam, ban ialeh ban pynneh pynsah ia ki um ki wah bad ia ki kam pynroi kiban pynneh pynsah ha ka jylla.
Ka National Water Award kadei kaba pynleit jingmut halor ki kam kiba bha bad ka jingtrei shitom kaba la leh da ki riewshimet bad ki kynhun ha kylleng ka ri na ka bynta ban pynurlong ia ka thong jong ka Jal Samridh Bharat.
