Shillong, Iaiong 25: Ka long ka sngi kaba kyrpang ia u Keri G Momin ha ka
5th Meghalaya State League hynne ka sngi Saitjain da kaba thep haduh 7 kol kaba la pynlong syndon ia ka A’chik SCO Rongjeng ban pynrem ia ka Balmanduri FC da 9-0 ha ka jingiakhun ha ka Group G ha Williamnagar.
Kane kadei ka sien kaba u nongialehkai ula ioh ban thep bun kol tam ha kawei ka jingiakhun ha kane ka samoi ialehkai kaba mynta bad kaei kaba la pynlong kaba kham kyrpang ka long ba kane kadei ka sien kaba nyngkong ia u Keri ban the pia ki kol ha ka minit kaba 18, 20, 24, 48, 71, 81 bad 84 kaba ka kyrteng ka jongu kala rung syndon ha ka MSL 5.
U Cherryan G Momin ula thep ia ka kol ha ka 58 minit bad u Junjun N Marak ula thep kol ha ka 90 minit na ka bynta ka ASCOR.
Ha ka jingiakhun ha ka Group H ha Mawkyrwat, ka Seng Samla Umdang Pyllun
kala pynrem ia ka Mawten SC da 4-3 kol.
U Bishalboklang Rongrin ula thep kol ha ka minit kaba 29 bad 71 bad Rangkynsaistar Mawsor ula thep kol ha ka minit kaba 56 bad 67 na ka bynta ka Umdang Pyllun, katba ka Mawten kala ioh thep ia ki 3 kol lyngba u Wellberjune Lyngdoh ha ka 16 minit, u Kynshewbor Pyngrope ha ka minit kaba 54 bad u Oversharp Iawphniaw ula thep ha ka 85 minit.
Ha ka Group C, ka Amlarem SC kala jop da 4-2 pyrshah ia ka Lamin XI SCC ha Amlarem. Mar ia sdang ka jingiakhun u Sanu Sumer ula thep ia ka kol ha ka minit kaba 5 hynrei haka minit kaba 32 u Wantiwjune Buam ula ioh noh ban pyniakhaid.
U Genial Lamin ula thep ia ka kol ha ka 46 minit mar ia sdang ka jingiakhun ha ka kylla miet hynrei ka Amlarem kala ioh ban pyniakhaid lyngba ka jingioh thep kol u Martial Nongrum ha ka 65 minit. Hadien kane ka Aamlarem kala ioh ban thep biang sa 2 kol lyngba u Iaid Da Kyrmen Jungai ha ka 65 minit bad u Wantiwjune ha ka minit kaba 77.
Ha ka jingiakhun ha MFA Ground Shillong ha ka Group B, ka Mawphu SC kala pynrem da 4-0 ia ka Mulang SC Nongbah. U Owenderson Nongrud ula thep ia ka kol mar syn sdang ha ka minit kaba 2 bad kadei ruh ka kol kaba sted tam ban ioh thep ha ka MSL 5 bad hadien kane u Steven Kynta ula thep kol ha ka 42 minit bad u Ferenstar Kharkongor u la thep ia ka kol ha ka minit kaba 45.
Ha ka kylla miet u Archeststar Malngiang ula thep ia ka kol ha ka minit kaba 73.
Ha ka Group D kaba la long ha Khliehriat, ka Thangskai Tiger SC kala pynrem ia ka Jalaphet Moochut Pyrdung da 1-0 ha kaba u Michael Siangshai ula thep ia ka kol ha ka minit kaba 26 tang hadien 2 minit ba ula ioh pdiang ia ka Yellow Card na u rephri.
Ha Mairang, ka Mishon SSCC kaba la mad ia ka jingshah rem arsien kynthih, kala wanphai bad khur ia ka jingjop da kaba pynrem ia ka Lawbah SC da 2-0 lyngba ka kol kaba la thep da u Pyndapboklang L Lyngkhoi ha ka minit kaba 74 bad u Rikyrshan Warjri ha ka 86 minit.
Ki jingiakhun ha ka sngi Nyngkong ha ka por 3 baje mynsngi:
Group A (Shillong SSA Stadium) – Khimusniang SC vs Umkaber SCC
Group B (Shillong MFA Ground) – Nangkiew Irat SC vs Mawlum Tyrsad SCC
Group C (Amlarem) – Lamin XI SCC vs Amlarem SC
Group D (Khliehriat) – Thangskai Tiger SC vs Jalaphet Moochut Pyrdung SC
Group E (Wahiajer) – Shillong Lajong FC vs Iatyllilang Lumsehkot CSC
Group F (Mairang) – Lawbah SC vs Mishon SSCC
Group G (Williamnagar) – Janepih YSCA vs Balmanduri FC
Group H (Mawkyrwat) – Mawlarshong SC vs Rangdajied United FC
