Nongpoh, Lber 1: Ka Meghalaya Auto Cross Drivers (MAD) ha ka sien kaba nyngkong, kala pynlong ia ka jingiakob pynher kali lane ka 1st Auto Cross Sprint Challenge ha ka 27 bad 28 tarik Rymphang ha madan ialehkai Kurkalang Bhoirymbong.
Ia ka MAD la lamkhmat da u samla Jeffrey Jyrwa kum u President, u Samla Osbert Wilfred Rynjah kum u Working President, samla Terrence Mawlong kum u Secretary nalor kiwei kiwei ki dkhot kiba treishitom ban kyntiew ia kane ka jingiakob pynher kali ha ki lynti kiba khohruh khohram bad kiba bun jingeh ban niah.
Ki nongniah kali na kylleng ka Jylla Meghalaya bad kumjuh ruh na ki Jylla ba marjan kynthup ka Mizoram bad Nagaland, kila wan iashimbynta ha kane ka jingiakoh niah kali. Ki nongiashim bynta baroh lang ki kotsha ka 46 ngut kynthup bad kynthei bad shynrang, kiba iakhun ha ki kyrdan bapher bapher.
U samla Jeffrey u iathuh, ba ka thong jong ka lympung ka long ban ai rynsan ia ki khun samla kiba don ia ka sap niah kali ha ki surok kiba bun ki jingeh lane kiba khohruh khohram ba kin pyni paidbah ia la ka sap ka phong ha ki madan ba ju pynlong ia kum kine ki jingiakob hynrei ym ha ki surok bah.
U la ong ruh ba ka kynhun ka la shim ia kane ka sienjam ha jylla namar ka jingshem ba ki samla kiba angnud ban shimbynta ha kum kine ki jingiakob, ki mad bun ki jingeh khamtam ha ka jinglut jingsep ban leit ia shimbynta sha ki jingiakob ba ju pynlong shabar jylla, da kaba bynrap ruh ba ka MAD ka angnud ban pynlong ia kum kane ka jingiakob niah kali man la u snem.
La sam ruh ia ki khusnam da ki song pisa bad trophies sha ki nongñiah kali kynthei bad shynrang kiba la jop ha ki jingiakhun jong ki kyrdan bapher bapher.
 ha ka sien kaba nyngkong, kala pynlong ia ka jingiakob pynher kali lane ka 1st Auto Cross Sprint Challenge ha ka 27 bad 28 tarik Rymphang ha madan ialehkai Kurkalang Bhoirymbong.){kind=link}