Shillong, Naiwieng 03 : Ka kynhun synrop ba thymmai jong ki Seng Sain Pyrthei ka lah ban mih ha ka thain Shatei Lam Mihngi, da ka jingthmu ban wanrah ia ka sur kaba khlain bad ba long kawei jong ki paid nongshongshnong ka thain.
La khmih lynti ba ia kane ka kynhun ki seng sain pyrthei ba thymmai yn sa pynbna lashai ka sngi ha New Delhi, ha kaba bun ki nongialam seng sain pyrthei ba paw ka thain Shatei Lam Mihngi kin iadonlang.
Napdeng kine, u Myntri Rangbah ka Jylla Meghalaya bad u National President ka National Peoples Party (NPP) Conrad K Sangma un iadonlang nalor u nongseng ka TIPRA Motha Party Pradyot Bikram Manikya Deb Barma, u nongaiktien barim ka BJP bad Myntri ka Nagaland Mmhonlumo Kikon bad u Nongseng ka People’s Party na Assam Daniel Langthasa nalor kiwei kiwei.
Kat kum ka khubor, ka Tipraha Indigenous Progressive Regional Alliance (TIPRA) ba iala da u Prodyot Bikram Manikya Deb Barma, ka lah ban iasoh noh bad ka NPP, kaba ialam da u Myntri Rangbah ka Meghalaya Conrad K Sangma, ban thaw ia ka seng sain pyrthei kaba treikam haduh kawei ka thain Shatei Lam Mihngi.
Ka TIPRA Motha, ka seng riewlum ba khlain bha ha Tripura, ka dei kaba wan ba-ar ha ka jingdon ki MLA hapoh ka Iingdorbar Thaw Ain ha Tripura da ka jingdon haduh 13 ngut ki MLA. Nalor kane, ki nongialam na Dima Hasao ha Assam ba ialam da u Daniel Langthasa, khun u Nongialam ka Congress Nindu Langthasa, uba shah pyniap ha ki kaikhlaw jong ka Jewel Gorlosa ba iapait na ka Dima Halam Daogah (DHD) ha ka 4 tarik Jylliew, 2007- la khmih lynti ba un iasnohkti lang bad ka NPP.
U nongialam barim ka BJP Mmhonlumo Kikon na Nagaland, uba la iehnohkam na ka BJP ha u Nailar mynta u snem, u dei ruh shibynta jong kane ka kynhun thymmai.
Ka khubor ka iathuh ba u Pradyot Bikram Manikya u dei uba nyngkong eh ban tyrwa ia ka jingthmu ban seng ia ka Northeast People’s Party, bad ula iakren bad bun ki nongialam seng sain pyrthei ha ki bnai ban wan ban lah pynurlong ia kane ka jingthmu.
Kane ka kynhun kan kren sha ki lad pathai khubor lashai ka sngi ha New Delhi ha Deputy Speaker Hall, Constitutional Club of India, Rafi Marg, New Delhi ha ka por 1 baje nohphaisngi.
