Shillong, Lber 25 : U Myntri Rangbah ka Jylla Conrad K Sangma ha ka sngi Balang ula pynpaw ba ka Sorkar Jylla kan sa shong bishar ia ka jingdawa ban thung ia ka jingtohkit halor ka jingkulmar kaba jia dang shen ha ri-lum Garo, kaba mih na ka jingpyrshah ia ki bar jylla ba kin iashimbynta ha ka elekshon Garo Hills Autonomous District Council (GHADC).
Haba jubab ia ka jingkylli, u Conrad ula ong “U Nongialam ka Liang Pyrshah Mukul Sangma ula kren bad thoh sha nga ha kine ki khyndiat sngi. Ki jingjia kiba jia bad ka rukom long ka jinglong jingman kaba mih ka donkam ia ki kynja jingtohkit ba kan don ban tip ba kaei kaba lam sha kane ka jingkulmar bad mano ba donkti bad khamtam ka bynta ba shah pynjulor ki nongkynti paidbah, ki nongkynti ki riew shimet” .
Ula bynrap “Hynrei kumno bad kaba kumno ka jingtohkit, ngin dang ban bishar namar hooid ngi la bunkam bad kane ka jinglong jingman. Kumta, ha kine ki sngi ban wan, ngin sa shim ia ka rai (halor ka jingthung ia ka jingtohkit)”.
Haba iadei bad ka jingtohkit ia ka jingkem naphang ia ki briew hadien ka jingkulmar, u Conrad ula ong “Sa shisien, nga la ken shai bha ia kane ka bynta ba ka ain kan sa iaid la ka jong ka lynti. Ki Pulit ki ju shim ia ki sienjam halor ki sakhi bad iaid kat kum ka ain. Ngam lah ban kynthoh eiei halor kane, ka dei beit ka kam ki Pulit bad kam dei kaba nga iashong bad nga bad pule ia ki file bad ki jingtohkit”.
Ula ban jur “U SP bad u DIG lane DG kin biang eh ban ai ia ka jubab, bad phi lah ban kylli na ki”.
.){kind=link}