Shillong, Nailar 29 : U Myntri ba dei peit ia ka tnad Marbam Bah Comingone Ymbon u la ong ba watla ka jingkiew dor ka dei ka jingjia ba la mih na ki daw bapher bapher, ka tnad kala trei shitom ha ryngkat ki District, ki Sub-Division bad baroh kiba don bynta ban tehlakam ia ka jingkiew dor ki mar ki mata ha ka jylla.
Haba wanrah ia ka jubab ia ka call attention ba la wanrah da u MLA ka VPP u Ardent M Basaiawmoit, u Bah Ymbon u la ong ba ka jingbishar bniah man ka por ïa ka dor jong ki marbam marbam ka la long ka atiar ha kaban thaw ïa ki buit na ka bynta ban pyrrkhing ia ka dork a mur ha ki iew, ban pynthikna ba ka jingkylla dor kan ym ktah ïa ki nongthied nongpet, khamtam ïa kito kiba na ki wan na ki longiing kiba duk.
“Ka tnad ka iai kut jingmut ban iada ia ka bha ka miat bad ki jingmyntoi jong ki nongthied nongpet da kaba pynthikna ia ka jingdon jong ki marbam ba kongsan ha ka dor kaba biang. Lyngba ka jingiai peit bniah, ka jingpyntreikam kaba pyrkhing, bad ka jingïatreilang bad ki bor ka Sorkar Jylla bad ka Ri, ngi ngeit skhem ba ki sienjam ba la shim kin ïarap ban pynduna ïa ka jingktah jong ka jingkiew dor ki mar ki mata ia ki paidbah jong ka jylla,” u la ong.
U Myntri u la pyntip ruh na ka bynta ban khanglad ia ki kam khaii pateng bym hok kum ka jingpyllang ia ki mar ban die hadien (hoarding) bad die black (black marketing), ka Jylla kala pyntreikam mynta ia ka Prevention of Black-marketing of Supply of Essential Commodities Act 1980, bad ka Essential Commodities Act, 1955.
Ka Tnad kala shah pynkupbor kat kum kine ki ain ban set ia ki briew kiba la lap ba ki kam jong ki ki pynthut ia ka jingpynbiang ia ki marbam ba kongsan. Ka tnad ka la shim ia ki sienjam kiba donkam ban pynthikna ia ka jingpyntreikam hok ia baroh ar tylli ki ain.
Ia ki Action taken reports (ATR) lane ki kam bala leh halor kine ki Ain, ki dei kiba la buh pynthymmai bad shong bishar man ka por ha ka portal jong ka Ministry.
U Myntri u la pyntip ruh ba ka Tnad kala pynlong haduh 79 sien ki jingkhynra ha ka jylla katkum ka ain jong Essential Commodities Act, 1955 and Prevention of Black-marketing of Supplies of Essential Commodities Act 1980.
“Kane ka jingkheiñ ka la kiew sha ka 107 sien ki jingkhynra ha u 2022-23 bad sha ka 274 sien ki jingkhynra ha u 2023-24. Kine ki jingpyrshang ki pyni ia ka jingangnud jong ka sorkar ban tehlakam ia ki jingleh bymman ia ki kam bymhok bad ban pynthikna ba ki paidbah kin ioh lut ia ki marbam ha ka dor kaba biang,” u la bynrap.
