Imphal, Jymmang 06: Ka jingjia iaumsnam ba khlem pat sangeh ha Manipur kala nang kyntiew ia ka jingiap jong ki briew sha ka 54 ngut bad bun ngut kila mynsaw.
Ka Sorkar Pdeng kala nang phah ia ki pyrton shipai sha kane ka Jylla ban pynjur ia ka jingpahara ha ki jaka kiba ka jingiakynad ka dang bteng. Ki shipai kila pynlong ruh ia ki flag march ha kylleng ki jaka ban tehlakam ia ki nongpynkulmar.
Hynne ka sngi saitjain, ka jinglong jingmankala kham jai jai ha Imphal valley bad bun ki dukan bad ki iew kila sdang ban plie bad ki kali ruh kila sdang ban mih sha surok.
Kat kum ka jingpyntip ki heh Sorkar, napdeng ki 54 ngut kiba iap, 16 tylli ki met la buh ha ka jaka buh metiap ha Churanchandpur District Hospital, 15 tylli ha Jawaharlal Nehru Institute of Medical Science ha Imphal East District, bad 18 tylli kidon ha Regional Institute of Medical Sciences (RIMS) ha Imphal.
Kiba bun ki dukan bad ki iew ha sor Imphal bad kiwie ki jaka kila plie hynne ka step sngi saitjain ha kaba ki briew ruh kila iamih ban iathied iapet ia ki marbam mardih, ki jhur hapdeng ka jingpahara kaba jur jong ki shipai.
Kat kum ka khubor, haduh 5 ngut ki kaikhlaw kila shah siat iap bad arngut ki shipai Indian Reserve Battalion kila mynsaw ha ka jingiather kuli ha Churachandpur District.
“Haduh 13000 ngut ki briew la ioh ban iarap bad pynkynrieh sha ki jaka rieh ba shngain, katto katne ha ki ktem jong ki shipai ia kiba la wanrah na Churachandpur, Moreh, Kakching bad Kangpokpi districts” ong u Nongaiktien ki shipai.
Palat 600 ngut ki briew na Manipur kila leit rieh sha Cachar District ka Jylla Assam.
