Jingjia Ichamati | Pynshai u SDPO ba kem halor ka jingsuba| pat lap sabut ba donkti ki dkhot KSU, ong ki Nongialam

Sohra, Iaiong 03: Ki Nongialam ka Khasi Students Union (KSU) kila pyntip ba u Sub Divisional Police Officer (SDPO) ka Sohra Civil Sub Division, ula pynthikna ba ka jingkem ia ki arngut ki dkhot ka KSU na South Khasi Hills, ka dei tang halor ka jingsuba bad ym pat lap sabut satia ban pynshisha ba ki donkti.

Kila pyntip ruh ba u SDPO ula ai ka jingkular ba ki Pulit kin ym kem shuh ia ki dkhot ka KSU halor ka jingjia ha Ichamati hynrei lada donkam ban tohkit, kin sa shu khot hajir ban kylli jingkylli.

Ia kane la pyntip da u Assistant General Secretary ka KSU Sengkmie samla Ruben Najiar, uba la hiar sha Sohra ban synran ia ki Nongialam bad dkhot ka KSU-South Khasi Hills, ha ka jingleit pan jingpynshai na ki Pulit ka Sohra Police Station halor ka jingshah kem ki arngut ki dkhot ka seng.

Haba pyntip ia u paidbah uba iatur sha Sohra Police Station halor ka jingmih na ka jingialang bad ki Heh Pulit, u samla Ruben ula ong “U SDPO ula batai shai ba ka jingkem ia ki dkhot ka dei tang namar ka jingsuba bad kam pat satia kano kano ka sabut ban pynshisha ia ka jingdonkti jong ki”.

U iathuh ruh ba une u Heh Pulit ula kular ruh ba lada ki Pulit kim lah ban pynshisha ia ka jingdonkti jong kine ki arngut ki dkhot ba shah kem, na ka liang ka jong u, un sa panmap hakhmat jong ki lad pathai khubor.

“Nalor kane, u SDPO ula pynthikna ba kan ym don shuh ka jingkem ia ki dkhot ka KSU hynrei lada donkam ban tohkit, yn sa shu khot hajir ia ki ban kylli jingkylli. La kular ruh ba kan ym don shuh ka jingleit thwet ia ki dkhot ka KSU ha ka por mynmiet ne shiteng synnia” pynbna u samla Rueben hakhmat u paidbah.

Une u Nongialam ka KSU ula maham pat da kaba ong “Lada ki pulit ki dang bteng ban khynra bad kem ia ki dkhot ka seng, ka seng kan hap ban pyrkhat ban iaid ne ban shim noh da kawei pat ka sienjam”.

Ha kajuh ka por, une u Nongialam ka KSU ula pynpaw ruh ia ka jingbynniaw halor ka jingkloi jong ki Pulit ban pyllait ia ka kyrteng jong ki arngut ki dkhot ka seng ba shah kem watla ki dang dei tang kiba shu suba ym kiba la pynthikna ba donkti ne shah rai pynrem.

“Haba kem ia ki bar jylla, ki Pulit kim ju pyllait ia ka kyrteng jong ki bad kane ka dei tang ka kam ban pynjah burom ia ka Jaidbynriew bad khamtam eh ban pynthohbria ia ka seng KSU” ula kynthoh.

Haba bynrap ia kane, u President ka KSU-South Khasi Hills samla Reebokstar Diengdoh ula ong ba lada ki Pulit ki dang bteng ban khynra ne kem ia ki dkhot ka seng, ka seng KSU kan iawer ia baroh ki dkhot ka Jaidbynriew ba kin mih ha manla ki jaka.

Ki nongialam ka KSU kila ai khublei ia ki paidbah kiba la wan ban ai ka jingkyrshan bad kum ka jaidbynriew kidei ban iatylli kawei halor kino kino ki mat kiba ktah ia ka jaidbynriew.