Shillong, Naitung 09 : Ka Tnad Meghalaya Police kala shem ba ki saw ngut ki briew kiba shah pyniap tohmet bha ha shnong Umpleng, East Jaintia Hills, la suba jur ba ki dei ki nongkhaii bad nongdie droks.
U DIG Eastern Range Davis NR Marak ha ka sngi Ba-ar, ula iathuh ba na ka jingtohkit bala sdang jong ki Pulit, la shem ba kine ki 4 ngut kiba shah pyniap ha Umpleng, la suba jur ba ki dei ki nongkhaii bad nongdie droks.
“Kine ki briew (ba shah pyniap) ki dei kiba dih droks bad ki dei ruh kiba khaii bad die droks. Kane ka dei ka jingshem jong ka jingtohkit” ong u Marak haba iakren bad ki nongthoh khubor.
Une u Heh Pulit ula pyntip ba ki Pulit kila ioh ia katto katne ki jingtip shaphang ki katto katne ki briew ba suba donkti ha kane ka kam pyniap briew.
“Ngi la iohksai katto katne bad ngi kyrmen ba ngin sa ioh kem shen ia ki briew ba donkti” ong u Marak.
Haba kylli, u DIG ula ong ba ka kam droks ka dei kaba shyrkhei bha ha East Jaintia Hills namar kam dei satia tang ka lynti iaid u droks hynrei ki don ruh bun kiba dih droks ha ka thain.
“Ym tang ba la thung ia ka SIT (halor kane ka case) hynrei ngi la peit pyrman ruh na ka Police Headquarter ym tang na ka Range Office hynrei ka DGP dalade kala khmih ia kane ka case” ula ong.
Ha ka 6 tarik Naitung, saw ngut ki briew la shem ba kila shah pyniap ha ka rukom kaba ingiew bad ishyrkhei bha ha Umpleng. Ki runar kila teh ia ki kti ki kjat jong kine ki saw ngut bad pom da ka wait na ki bynta jong ka khlieh.
Arngut na kine ki briew ba shah pyniap, la wan ban pynithuh da ki bahaiing hasem kum u Ravi Rai ba 23 snem na Patha Elam, Nepal bad u Nasar Kyndait ba 33 snem ba na Dkhiah East Pohshnong, East Jaintia Hills District.
Ki Pulit kila register case ia kane ka jingjia ha Khliehriat Police Station.
