Shillong, Risaw 15 : Ka jingialang hapdeng ka Hynniewtrep Border Dispute Redressal Forum (HBDRF),ki Khlieh Nongsynshar bad ki Sengbhalang, kila pyrshah jur ia ka sienam jongka Sorkar Jylla ban iapynbeit shuwa ia ka jingiakajia pud ha Psiar-Khanduli sector ha ka jaka ban shim sienjam ban pynthikna ia ka jingwan phai biang jong ka Block-I bad II sha Meghalaya.
Haba iakren bad ki nongthoh khubor hadien ka jingialang ba long ha sngi sngi saitjain ha Jowai, u Nongaiktien ka HBDRF Bah Thomas Passah ula ong “Ngi la rai ban iatreilang kum kawei ka kynhun, kawei ka sur bad kawei ka agenda ban pynthikna ba ka Block-I bad II kin wanphai biang sha Meghalaya”.
“Ngi la rai ruh ban kyntait mardor ia kano kano ka jingpyrshang jong ka Regional Committee lane ka Sorkar Jylla ban pynbeit shuwa la ka jong ia ka Psiar-Khanduli sector” ula ong haba bynrap “Ka nongrim jong ngi kala shai kdar ba dei ban iakren bniah halor ka Block-I bad II namar ka Psiar bad ka Khanduli ruh ki hap hapoh ka Block-I”.
U bah Passah ula ong “Kat kum ki jingtip bala ioh, kala don ka jingpyrshang na ka Sorkar Jylla ban iakren shuwa tang ia ka Psiar bad Khanduli bad lada kane ka dei ka jingshisha, ngi kwah ban buh hakhmat ka Sorkar ba ngi pyrshah ur ia kane bad ngin ym kyrshan ia ka Sorkar ha kum kine ki rai bala shim”.
U bah Passah uba dei ruh u Working President ka KHNAM,ula ong ba ki Daloi bad ki Rangbah Shnong ka thain kila pyntip ha ka jingialang halor ka jingbym kynthup lang ia ki ha ka Regional Committee ban iakren ia ka kam khappud hynrei kala shu pyndonkam ia ki tang kum ki “postmen’ ban wanrah ia ki kot ki sla bad ban aiti ia ki kot ki sla.
Nalor kane, ka jingialang kala rai ban thoh biang sha ka Sorkar Jylla halor ki nongrim ba ka ieng hashuwa ba kin rai ia ka kylla kaba ar jong ka jingiakren pud.
Ula ong “Baroh ki paid ka Ri-lum Jaintia da kawei ka sur, kila dawa ban pynphai noh ia ka Block-I bad II”.
Halor ka jingkylli, une u Nongaiktien ula maham ba “Lad aka Sorkar ka rai ban pyniaid shuwa ia ka jing iakren pynbeit pud tang jong ka Psiar-Khanduli, ngin hap ban shim ia kiwei pat ki sienjam namar lada iakren pynbeit mynta ia ka Psiar-Khanduli, ka mut ba ngi la duh noh iakiwei pat ki jaka ka Block-I, ka ban long ruh ka sngi ba sngewsih tam ia ki paidbah ka Jylla”.
Kat kum ka jingong jong u, ki don palat 36 tylli ki shnong kiba hap hapoh ka thain Block-I.
