Ki MDC ka VPP ki dei ki bym don discipline, ong u Chairman
Jowai, Rymphang 28 : Ka Jaintia Hills Autonomous District Council (JHADC) kala jied biang ia Dr Sankey Shangpung kum u Chairman bad ia u Bah Thombor Shiwat kum u Chief Executive Member (CEM) ba thymmai ka Council.
Ia kane ka elekshon Chairman la pyniaid da u Deputy Commissioner ka West Jaintia Hills Abhinav Kumar Singh.
U Dr Sankey Shangpung, MDC ka NPP na Bataw-Lakadong ula jop ia ka elekshon da ka jingioh haduh 20 vote bad u kyrtong ba iakhun pyrshah, MDC ka INC na Saphai-Sahsniang Bah Rikut Parein ula ioh 6 vote bad ka NOTA kala ioh 3 vote.
Ha ka elekshon CEM, tang 20 ngut ki MDC kila iashimbynta ha ka jingiathep vote katba ki 8 ngut ki MDC ka VPP kila jah napoh ka Iing bad khlem iashimbynta satia.
Ha kane ka elekshon, u CEM barim Bah Thombor Shiwat na ka NPP, ula ioh haduh 17 vote bad 3 ngut ki MDC kila jied ia u MDC ka Congress Bah Madonbai Rymbai.
U Bah Thombor Shiwat uba long MDC la saw samoi na Moodap-Umladang, un dei uba la bat ia ka shuki CEM ka JHADC haduh 4 sien bad kane ka kynti kaba mynta.
Haba ai jingkren aikhublei ia u CEM ba thymmai, u Chairman Dr Sankey Shangpung ula ai khublei ia baroh ki MDC kiba la iashimbynta ban jied ia u khliehduh jong ka Council haba pynpaw ia ka jingkyrmen ba kine ki 29 ngut ki MDC ba mynta ba kynthup ia 5 ngut ki CEM barim kin wanrah ia ka jingkylla kaba don jingkyrmen hapoh ka Council bad ka Ri-lum Jaintia.
Hynrei ula pynpaw pat ia ka jingbynniaw halor ka jingpep jong ki MDC ka VPP napoh ka Iingdorbar ha ka por ba jied ia u CEM ba thymmai bad ong ba kine ki MDC ki dei ki bym don discipline bad kyrmen ba kine ki MDC ki dei ban don ia ka kor bad ban iashimbynta ha ki Dorbar jong ka JHADC.
Lah ban kdew ba tang 20 ngut ki MDC kila iashimbynta ha ka elekshon CEM bad ki 8 ngut ki MDC ka VPP kila shu jah rngai khlem kano kano ka jingpyntip.
 kala jied biang ia Dr Sankey Shangpung kum u Chairman bad ia u Bah Thombor Shiwat kum u Chief Executive Member (CEM) ba thymmai ka Council.){kind=link}