Nongpoh, Rymphang 28 : Ki Pulit ka Ri-Bhoi District hynne ka sngi Thohdieng, kila khang bad kyrngah ban ai ka jingiatreilang ia ka kynhun ki Pulit ka Assam, ba kin pynlong ia ka jingkhynra hapoh ka skulbah University of Science & Technology Meghalaya (USTM), kaba don ha Baridua, Killing, Ri-Bhoi District.
Kane ka jingwan khynra ki Pulit Assam ia ka USTM ka dei shibynta na ka jingtohkit pyrshah ia u Chancellor ka USTM Mahbubul Hoque, uba la shah kem halor ka jingkynnoh donkti ban iarap leh thok ha ka eksam CBSE klas XII Physic ha kawei ka skulha Patharkandi, Assam jong ka ERD Foundation ba long Chairman u Hoque.
Ki Pulit ka Assam kila kem ia u Mahbubul Hoque ha ka 22 tarik Rymphang 2025 lem bad ia kiwei pat ki nonghikai kiba la shah kynnoh donkti lang ha kane ka kam thok.
U Superintendent of Police ka Ri-Bhoi District VS Rathore ula iathuh ba ki Pulit ka Assam kila wan sha Khanapara Police Station ban pan ia ka jingiatreilang na ki Pulit ka Thanad ban leit khynra ia ka USTM halor ka case pyrshah ia u Chancellor bala mudui ha Sribhumi Police Station, Assam.
U iathuh ba ki Pulit ka Ri-Bhoi kila kyrngah ban ai ka jingiatreilang bad ki Pulit ka Assam halor ka nongrim ban khanglad ia kano kano ka huri hura ne ka kynrum kynram (Law & Order) kaba lah ban mih na kane ka jingkhynra.
“Ngi la bthah ia ki Pulit ka Assam ba ki dei ban wanrah da ka Search Warrant na ka Iingkasahri ba kin lah ban leit khynra ia kane ka skulbah (USTM) ne ha kino kino ki bynta jong ka District” ula ong.
U iathuh ba ki Pulit ka Assam kila hap ban leit phai thylli noh sha la ka jong ka Jylla namar kane ka jingkyntait ban iatreilang da ki Pulit ka Jylla.
