Shillong, Naiwieng 26: Ka North East Students Organization (NESO) hynne ka sngi kala jied biang u president barim ka KSU u bah Samuel B Jyrwa kum u Chairman ka NESO naka bynta ka samoi treikam 2022-2025.
Ia u bah Samuel la jied haka jingialang jong ka NESO General Council kaba la long ha Khumulwng ka jylla Tripura, kaba sdang naduh ka 22 haduh 26 tarik mynta u bnai.
Ka NESO kala jied ruh ia u bah Daniel Khyriem u badei ruh u President barim ka KSU kum uwei na ki 6 ngut ki Co-ordinators.
Kiwei ki nongkitkam thymmai ka NESO ki kynthup Chief Adviser u Dr. Samujjal Bhattacharjya, u Upendra Debbarma bad u Sinam Prakash Singh kum ki Advisors, u Dipanka Kr Nath bad u Ricky Lalbiakmawia kum ki vice chairmen, u Mutsikhoyo Yhobo kum u secretary general, u Manseng A. Sangma bad u Wangjam Sanatomba Meitei kum ki assistant secretary generals, u John Debbarma kum u finance secretary bad u Sanker Jyoti Baruah, u Ejanthag Ngullie, Prikeshwar Moirangthem, Lalremruata Hlondo bad u Bikash Debbarma kum ki co-ordinators.
Ha ka jingialang jong ka NESO kala iakren haba iadei bad ka jingiakhun pyrshah iaka jingwan rung kyrthep ki bar ri hapoh ka thainShatei Lam Mihngi (North East) baroh kawei namar kane kan buh jingma iaka snap kyrpang jong ki rit paid riewlum ka thain ha baroh ki jylla.
Haba iadei bad ka pule puthi, ka NESO kala iakren haba iadei bad ka jingdonkam ban thaw khambun ki lad ai jinghikai iaki samla lane ki Professional bad ki Technical Institutes ha baroh kawei ka thain Shatei Lam Mihngi.
Ka NESO ka dawa ruh naka sorkar pdeng ba kadei ban pynbna syndon iaka thain Shatei Lam Mihngi kum ka ‘Special Employment Zone’ bad ban thaw daka ‘Regional placement/employment exchange’ ban pyntip paidbah halor ki jinglait kam kiba lah ban wanrah jingmyntoi iaka thain baroh kawei.
La ong ba kala donkam ban ithuh kyrpang iaki samla ka thain Shatei Lam Mihngi naka bynta ban thungkam ha ki tnat treikam sorkar pdeng ym tang ha ki kyrdan Grade III bad IV hynrei wat ha ki kyrdan Grades I and II.
Ha ka jingialang ka NESO kala shim ruh iaka rai ban wanrah syndon daka Resolution ban dawa ia ka jingithuh kyrpang lyngba ka riti synshar ka ri India ban iada iaka jylla Tripura bad naka liang ka NESO kala shim ruh ia ka rai ban iai kyrshan iaka jylla Tripura ban pynneh pynsah iaki rit paid jong kane ka jylla.
Ka NESO ka iai ban ruh haba iadei bad ka jingdawa Inner Line Permit (ILP) ha kiwei ki jylla ka thain ki ba khlem pat pyntreikam ia kane ka ain bad kumjuh ruh ka la dawa ban eksamin biang iaka rukom pyntreikam iaka NRC hapoh ka jylla Assam.
Kala dawa ruh ba ym dei ban pyntreikam iaka Citizenship Amendment Act (CAA) 2019 hapoh ka thain bad dei ban pynneh iaka jinglong trai kyrpang ki paidbah iaka khyndew ka shyiap bad kumjuh ruh ban don daka por laka jong (Time Zone).
Nalor kine ka NESO ka dawa ruh ba dei ban pynrung noh iaka ktien Kok Borok, Khasi bad Garo hapoh ka khyrnit ba phra ka riti synshar ka ri India.
