Mih ka jingiather maw bad siat tear gas, shah wiang ding ka bos Pulit
Shillong, Naiwieng 24 : Ka jingialang sngewlem jong ki kynhun Sengbhalang ia ki 5 ngut ki briew ba iap ha Mukroh ba long hynne ka janmiet sngi palei ha Barik, kala jan klang sha ka huri hura da ka jing mih ki riewshimkabu kiba la ther maw sha ki Pulit ba pahara kaba la pynlong ruh ia ki briew ka ain ban siat ia ki bomb lyer pynsat khmat.
Katba ka jingialang sngewlem ka dang iaid shakhmat, katto katne ki riewshimkabu kiba la sop la spain ia ki durkhmat, kila leit ther maw bad kawang petrol bomb sha ki Pulit kiba pahara marjan ka jaka ba long ka jingialang.
Kane ka jingialang sngewlem ka dei kaba la pynlong da ki san tylli ki Sengbhalang ba kynthup ia ka Khasi Students’ Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF), Ri Bhoi Youth Federation (RBYF) bad Jaintia Students’ Union (JSU) hakhmat u mot U Kiang Nangbah hajan Shillong Civil Hospital.
Shuwa kane, kane ka kynhun ki samla kala leit ban pynkhyllem shuwa ia ka Traffic Police Booth bad kawang maw ruh ia ka bos kaba pyndonkam da ki Pulit kaba don u nombor ML05-B-8515 haduh ba kane ka bos kala julor lut ki iit.
Kine ki samla kila wiang ding ia ka police booth bad ia ka taiar jong ka bos hynrei ia kane ka ding la leit ban pynlip noh da ki katto katne ki Nongialam jong ki Sengbhalang, kiba la beh ruh ia kine ki samla kiba thmu ban thaw ia ka jingkulmar.
Kine ki Samla kila kiew sa sha Barik Point ban ther maw ia ki Pulit bad hangne kila kawang ia ki petrol bomb kaba pynlong ia ki Pulit ban siat ia ki bomb pynsat khmat ban pynsakma ia kine ki briew.
“Ngi la siat katto katne ki bomb pynsatkhmat ban pynsakma ia kine ki kynhun kiba thmu ban pynkulmar bad buh jingma ia ki nongleit nongwan bad ki kali kiba dang iaid” ong u Bah Vivek Syiem, Superintendent of Police (City).
Une u Heh Pulit u pyntip ruh ba ki don haduh lai ngut ki briew kila shah shoh ha IPG bad hajan Civil Hosptal bad kine ki briew kila mynsaw.
U Bah Vivek u pyntip ba ki Pulit kila register ia ka FIR halor kine ki jingjia.
Lah ban ong, naduh ka por shwa ban kut ka jingthang mombati kila don ki samla kiba la sdang ban leh shongshit da ka jingthmu ban pynhuri hura hynrei ki nongialam sengbhalang kila kyntu ia baroh ban leit phai noh da kaba jai jai sha la iing bad ban ym thaw ia kino kino ki jingklumar hynrei ki don pat ki bym shim la burom ne patiaw iaka jingkyrpad jong ki nongialam sengbhalang.
