Shillong, Jymmang 25 : Ka Sorkar kala jan dep pura ha ka jingsam Voluntary Retirement Scheme (VRD) sha ki Nongtrei ka Mawmluh Cherra Cement Limited (MCCL) bad kala mang palat T.100 klur na ka bynta kane ka skhim, ong u MLA ka NPP na Sohra Bah Gavin M Mylliem ha ka sngi Nyngkong.
Ka jingai khublei khatduh ia ki nongtrei la mynjur ha u bnai Lber 2025 hadien ba ki nongtrei kila pdiang ia ka jingtyrwa VRS ka Sorkar.
U MLA ula pyntip ba ka Sorkar kala dep siew ia ar-lai tylli ki installment jong ka VRS sha ki nongtrei.
Watla ka Sorkar kala buh ia ka por ba 3 snem ban pyndep ia ka jingsam ia ka song VRS, u Bah Gavin ula iathuh ba artylli ki installment lah dei ban siew tang ha kawei ka snem mang tyngka.
“Ka Sorkar kala ai ka jingkular ha katei ka por ba kan pyndep ia kane ka jingsam VRS sha ki nongtrei tang hapoh ka lai snem mang tyngka hynrei nga sngewnguh ia ka Sorkar hapoh ka jingialam u Myntri Rangbah Conrad K Sangma namar ba tang hapoh uwei u snem mang tyngka, kila pyndep ia artylli ki installment napdeng ka 3 installment” ula ong.
Satang kawei ka installment kaba dang sah, kaba kot kumba T.27 klur.
Halor ka jaka ba ieng ka karkhana MCCL, u Bah Gavin ula ong ba kane ka jaka ka hap hapoh ka Hima Sohra bad ka jingaiwai kala kut noh saw snem mynshuwa.
“Kane ka dei ka jingkylli kaba biang eh ban kylli na ki nongpyniaid ka MCCL ba kumno kin leh ia ka karkhana hynrei haba iadei bad ka jaka ba ka karkhana ieng ka hap hapoh ka Hima Sohra” ula pynpaw.
“Hooid, lada ngam bakla ka jingaiwai ia kane ka jaka kala kut ha u snem 2020. Kumta, ia mynta nga tharai ka don ha ka kti ka Hima Sohra ban rai ia kane ka jaka” ula bynrap.
 sha ki Nongtrei ka Mawmluh Cherra Cement Limited (MCCL) bad kala mang palat T.100 klur na ka bynta kane ka skhim, ong u MLA ka NPP na Sohra Bah Gavin M Mylliem ha ka sngi Nyngkong.){kind=link}