Shillong, Jymmang 25: Ka shnong Dympep ha Sohra kan ioh ia ka Skywalk kaba nyngkong eh ha ka thain Shatei Lam Mihngi, ha kaba 20% na ka T.51 Klur jong katei ka projek lah dep ban pyntrei, kaba la sdang naduh u Naiwieng jong u snem ba la dep, ong u MLA ka NPP Bah Gavin Miguel Mylliem hynne ka Sngi Nyngkong.
Kane ka Skywalk kaba jrong 40 kadei kaba la khmih lynti ban pyndep ha ki bnai kiba khatduh jong u snem 2027 bad kadei kaba la pyntrei da ka jingthmu ban khring ia ka jingwan tuid ki nongjngohkai sha ka shnong Dympep bad ki jaka kiba marjan.
“Ka jingtrei kala sdang ha u Naiwieng jong u snem bala dep. Kane ka jingtei kala iaid shakhmat. Katkum ki kaiphod na ka tnad, ka jingiaid ki kam baroh kumba ka long haduh mynta kala kynjoh sha ka 20%” la ong u Bah Gavin Mylliem.
“Kane kadei kawei na kiba kham pher”, la ong u MLA ka Sohra bad ka bynrap “Nga ngeit skhem ba shisien ba la dep shna lut kane ka projek kan kyntiew shuh shuh ia ka kam jngohkai ha ka thain Dympep bad ki jaka kiba don marjan. Kadei kawei na kiba nyngkong eh ha ka thain shatei lammihngi ka ri. Nga tharai ngin lah bha ban khring ia ki nongjngohkai haba ki wankai sha kine ki bynta jong kane ka thain”.
Ula ong, ruh ba ka Nohkalikai Tourism Project hapoh jongka PM-Divine Scheme kala iohpdiang ia ka bhah tyngka ha u Naiwieng jong u snem bala dep. Ka jinglut jingsep jong katei ka projek kala kot ia ka T.38 Klur, lah dep ban khot ia ka tender bad ka jingtrei ia kane ka kam kan sa sdang noh shen.
“Ka jinglut jingsep jong katei ka projek ka long kumba T.38 Klur bad lah dep ban aiti ia ka kam sha u Contractor. Nga tharai kin sa sdang noh ban trei ia ka kam ha kien ki khyndiat sngi kiban wan” ula ong.
Halor ka jingkylli la kan ktah ia ka sawdong sawkun jong ka mariang, u Bah Gavin Mylliem ula ong ba lah dep ban pynwnadur na ka bynta ban iada ia ka mariang.
“Haba pynkhreh ia ka detailed project report (DPR) ki Consultant kila shim lut ia kitei baroh ha ki jingmut jingpyrkhat namar ba ngi sngewthuh ba namar kum kitei ki scheme, ka PM-Divine Scheme bad bun kiwei kiwei ki Scheme, ka bynta jong ka mariang ka long kaba kongsan bha ban buh hakhmat eh, kumta ngam tharai ba kan don kano kano ka jingktah ia ka mariang” ula ong.
