Shillong, Jymmang 25 : Ka jingkhangtih deiwong ha u 2014 kala ktah jur bha ia ka ioh ka kot ha Sohra khamtam ka Shnong Laitryngew bad Mawkma kiba shaniah tylli ha ka kam tih dewiong kiba duh ia ka kamai jakpoh, ong u MLA ka NPP na Sohra Bah Gavin Mylliem ha ka sngi Nyngkong.
Ula bynrap ba ka kam jngohkai kala mih pat kum ka nongwanrah ia ka ioh ka kot ha ka thain.
“Hooid, ngim lah ban len ia ka jingshisha ba ha kine ki bun snem bala leit naduh ka khang tih dewiong ha u 2014, ngi don ki jaka kum ka Laitryngew, Mawkme ha kito ki snem shuwa u 2014, bun na ki briew ki shaniah ha u dewiong na ka bynta ka ioh ka kot jong ngi” ong u bah Gavin haba iakren bad ki nongthoh khubor.
Une u MLA ka Sohra ula ong ba kane ka jingkhang tih dewiong kala pynbor ia ki nongshongshnong ban wad da kiwei pat ki lad kamai, bad ka kam jngohkai kala weng suki suki ia ka jingeh.
“Hynrei hadien ka jingkhang tih dewiong, phim lah ban lem ia ka jingshisha ba ki kam jngohkai kila iarap shisha ban kyntiew ia ka kamai kajih jong ki briew ha ka thain” ula ong.
U Bah Gavin ula pynpaw ba ka jingkring ka Sohra kala paw ym tang ia ki nongwankai nala iing. “Ka Sohra kala lap ban khring ia ki nongshangkai ym tang napoh ka Ri hynrei wat ki nongshangkai na kylleng ki ri ka pyrthei” ula ong.
Ula ainam ia ka jingiashimbynta ki Shnong ki thaw ha ki project ba kyrshan ka Sorkar halor kane ka jingkylla. “Baroh ki Shnong kila ai ia ki ktien sha ka Sorkar bad khamtam bad kine ki project kiba hap hapoh ka PM-Devine, World Bank, skhim ADB” ula ong.
“Namar kane, ngi sngewthuh ba ki briew na ka thain bad ki shnong ki thaw kila sngewthuh ba kane ka kam (jngohkai) kala synniang shikatdei eh sha ka ioh ka kot jong ka thain” ula bynrap.
Watla ka kam jngohkai ka la kiew, u Mylliem u la phla ba ka Sorkar ka lah ban leh duna eh ha ban pynneh ïa ka dor kaba jem jong ki jaka sah ki riew shimet haba kiew ka jingdawa.
“Kata ka dei ka jingkylli kaba eh namar ban pynbeit ïa ka dor haba phai sha ki jaka sah ki riew shimet, ka long kaba eh bha na ka bynta ka Sorkar ban pynbeit,” u la ong haba la kylli shaphang ka jingpynbeit ïa ka dor sah.
U la ong ba ki jaka sah kiba rem dor ha Sohra ki dang duna. “Mynta nga pyrkhat tang ka Jiva, Polo Orchid ki ai ïa ki jaka sah kiba rem dor kumta hooid ngin sa peit aiu ka Sorkar ka don ha ki sngi ban wan ban pynthikna ba ka jaka sah kaba jem dor lah ban ai sha ki briew,” u la bynrap.
