Shillong, Naitung 2 : U Director ka tnad ka Koit ka Khiah, Dr. Aman War ha ka sngi Saitjain, kata ar sngi hadien ba u la shongthait noh na ka kam, u la kiew ha ka rynsan elekshon ban pynithuh ialade kum u dkhot ba thymmai jong ka United Democratic Party (UDP) ka North Shillong Constituency.
Ha katei ka jingialang pdiang burom kaba long ha Khasi National Dorbar Hall nalor ki spah ngut ki nongialam jong ka party na ki unit bapher bapher jong ka constituency, la don lang ruh u Working President ka Party Bah Paul Lyngdoh, nangta u Vice President ka party, Bah Alantry F Dkhar nalor kiwei kiwei.
U Dr. Aman haba kren ha katei ka jingialang u la iathuh ba ka daw kaba pynslem ia u ban mih pyrthei ha katei ka rynsan elekshon kadei namar u kwah shwa ban pyndep ia ka kam kum u shakri sorkar. “Nga hap ban ap haduh ba ngan da ioh ban pyndep lut shwa ia ki kam ki jam kiba iadei bad ka sorkar, dei na kata ka daw ka shimpor ba ngan ioh ban kynduh ia phi,” ula ong.
Da kaba pynpaw ia ka jingkmen ban iohi ia ka jingwan shim bynta shitrhem jong ki nongialam ka party ha katei ka jingialang, u Dr. Aman War u la ong ruh ba kaba pynkmen ia u kadei ba u iohi ba dei tang ki ‘original UDP na katei ka constituency kiba poi ym ba la shu pynbun na kiwei pat ki constituency.
Na ka liang ki nongialam jong ka party ki la pynbna ruh ha kane ka sngi ba ka jingialang pdiang burom kaba kham shongkun bad ban pynbna artad ia u Dr Aman kum u kyrtong jong ka UDP na North Shillong Constituency, kan sa long ha ka 6 tarik mynta u bnai.
