Shillong, Nailur 23: Ar ngut ki samla kiba kynthup ia kawei ka kynthei kaba dang 18 snem ka rta bad uwei u shynrang uba la don 20 snem ka rta, kila jah na ka iing ka jongki naduh ka 20 tarik mynta u bnai.
Ia kitei ki arngut la iohi khatduh ha ka por 5 baje janmiet ha ka jaka sah ka jong ki kaba don ha shnong Marbisu hajan Mawphlang.
Haduh mynta, ym shim la ioh jingtip iaka leit ka wan ka jong ki, hynrei ki bahaiing bahasem jong kitei ki arngut kila shimkhia da kaba leit ban ujor sha ki pulit Mawngap Police Station.
Ki bahaiing bahasem jong kitei ki ar ngut ki samla kila leit ruh ban wad ha kylleng ki jaka ia kitei ki arngut bad kila leit ruh ban pan jingiarap na ki paidbah halor kane ka jingjah rngai.
Kila kyntu ruh ba lada don kino kino kiba iohi ba kin mih shakhmat ban ai ia ki jingtip ban lah ban lap ia kitei bad kino kino kiba don ia ki jingtip ki lah ban phone sha ki bahaiing bahasem ha kine ki nombar 8837472633 lane 6909673390.
