Shillong, Nailur 24 : Ka Sorkar Jylla lyngba ka Tnad Urban Affairs, kala ithuh ia ka jaka ha Khliehriat ban buh ia ka Solid Waste Management & Disposal Plant ne ka jaka theh niut jong ka sor Jowai bad ka sor Khliehriat.
Kane kala paw kat kum ka Expression of Interest (EOI) bala pynmih da u Director ka Tnad Urban Affairs, kaba la kdew shai ba la pynthikna ia ka jaka ha Khliehriat ban pynlong kum ka jaka theh niut jong ka sor Jowai, kaba la mad ia ki jingtynjuh namar ka jingbym ioh jaka theh niut la slem bha.
Ka Sor Jowai, kala kup ia ka dur kaba ijli bha da ki bun bun bnai na ka daw ka jingkynton jong ki niut ki nier ba mih na ki Iing briew bad ki iew ki hat. Kane ka jingkynton ki niut kala mih namar ka jingbym ioh ia ka jaka ban pynlong ia ka jaka theh niut ba shirta jong kane ka sor hadien ka jingmih ki jingpyrshah na ki paidbah ha kiba bun ki Shnong ba thmu buh ia ka jaka theh niut.
Ka Tnad Urban Affairs kat kum ka EOI baka pynmih, kala khot ia ki Kompani / Firm / Agency / riew shimet / ki Kynhun / Institute kiba pawkhmat, kiba kwah iadei kam bad ka Tnad ba kin “pynwandur (design), pyntrei (Build) bad aiti (Transfer) ha kaban shna ia ka Solid Waste Management & Sanitary Landfill ba 10 ton shisngi ryngkat kiwei kiwei ki kam ba don jingiadei bad ka project ha Khliehriat”.
Ka Tnad kala buh ia ka 10 tarik Risaw kum ka sngi ba khatduh ban phah ia ki EOI sha u Director jong ka tnad.
