Shillong, Risaw 29: Ka PRIME Meghalaya ha ryngkat ka jingiatreilang bad ka Bio-NEST NIPER Guwahati, ka la sdang ia ka sienjam ba khraw ban pynshisha da ka jingstad saian bad ban kyrshan ia ki nongsumar tynrai jong ka Jylla Meghalaya.
Kane ka dei kum shi bynta ban pynneh pynsah ia ka pateng ba riewspah jong ka Jylla ha ka rukom sumar tynrai daka ba pyniadei ia ki rukom sumar kat kum ka jingstad saian bad ban plie ka lad ban sengkam sengjam.
Kum ka jingsdang la lum ïa ka jingtip ba bniah jong ki 769 ngut ki nongsumar tynrai na kylleng ka Jylla, bad la jied kyrpang ïa 143 ngut ki nongsumar tynrai ki ban don bynta ha ka bynta ba nyngkong jong ka prokram hadien ka jingpynshisha kaba bniah bha lyngba ka tele.
Ka rukom pynshisha ha kaba sdang kan pynleit jingmut ha ki dawai tynrai na ka bynta hynriew tylli ki jingpang kynthup ïa ki jingpang gastric, colic pain, malaria, acidity, gallstones bad jingpang arthritis.
Ha kane ka sngi la iasoi ia ka Memorandum of Understanding (MoU) bad 5 ngut ki nongsumar tynrai ba la jied na ka bynta ka bynta ba nyngkong jong ka prokram.
Ki nongsumar kiba la shah jied ki kynthup Richard Syiem, Jop Pohtmi, Teibor Lyngdoh, Minnerson C.H. Sangma bad Phidalyne Nongsiej.
U Ankur Adhikary, CEO jong ka Bio-NEST NIPER Guwahati, bad ka Dr. Bethsheba Basawiamoit kila pynksan ba ka jingiatreilang ka thmu ban seng ia ka rynsan kaba la buh ryntih na ka bynta ka jingpynshisha jong ka juk saian bad ka jingpynroi ia ki kam ha ka liang ka jingsumar tynrai.
Ka jingthmu ka pyni ia ka rukom treikam kaba pura bad kaba peit shakhmat ban pynneh pynsah ia ki rukom sumar tynrai jong ka Meghalaya katba ka kyntiew ia ka jingroi kaba neh bad ki lad seng kam seng jam.
