Shillong, Nailar 08 : U musla ksiar na Meghalaya ula ioh ia ka khusnam naka Food and Drink Accreditation Scheme ba heh duh hangne ha sla pyrthei, kaba pynphai khmat lut ia baroh sha ka jingtrei shitom jong ki nongrep kiba pynmih ia une u musla.
Hooid, u shynrai Lakadong na Meghalaya ula ioh ia ka kyrdan 2-star ha ka Great Taste Award, kaba thew ia ka jinglong kum u mar ba kynsai bha.
Ka Great Taste Award bala pynlong da ka Guild of Fine Food ka dei ka Food and Drink Accreditation Scheme ba shaniah tam bad ba heh duh ha ka pyrthei. Ka ai jingithuh ia ka jingbha ki mar kat kum ka kyrdan kaba sdang na ka 1, 2 lane 3-star. Kane ka iarap ban pyntip sha ka pyrthei ia u mar bad long ka rynsan ia ki nongjop ba kin ioh ka jingithuh ha ka pyrthei.
Kumba 3,500 tylli ki kompani ba ki 115 tylli ki Ri ka Pyrthei kila iashimbynta ha ka Great Taste mynta u snem bad kine kila wanrah haduh 13,672 tylli ki mar ban shah bishar. Ia kine ki mar la mad da ki Nongbishar ka Guild ba don palat 500 ngut kiba kynthup ia ki Food critics, chef, recipe creator, buyers, retailer bad kiwei ki riew shemphang ha ka bam ka dih. Ia ki mar la shong bishar haduh 92 sngi bad baroh ki mar kila ioh ia ka jingkynthoh la ki dei ne em kiba bit ban ioh ia ka khusnam.
Une u mar (shynrai Lakadong) u dei uba la pyniaid iew da ka kompani Dear Farmer na London, kaba treikam ha kawei ka shnong rit ha West Jaintia Hills, Meghalaya. Ia ki kam baroh naduh ka jingthung ia u tynrai haduh ka jingtyllait sha u powder, la leh da ka kynhun ki nongrep kynthei kiba dei shibynta jong ka Self Help Group (SHG) bala tip kum ka Lakyntulang. Kane ka SHG ka dei kaba khlieh da ka kong Matilada bad Ioi Tang.
U shynrai Lakadong ula ioh ia ka kyrteng na ka shnong Lakadong, kaba don ha ki kjat lum ka ri-lum Jaintia.
“Ha u snem 2023, hadien ba shong ia artylli ki liengsuin bad artylli ki taxi, khatduh nga la iakynduh ia ki Nongrep ! Ha ka por Covid, nga la ioh iakren ia kawei ka kompani ba na Assam kaba la pynioh ia nga ban iakren bad ki. Ka shimpor ia nga katto katne snem ban wad jingtip bad poi sha u pud ban iakynduh ia ki nongrep jong u shynrai Lakadong. Ha u 2022, ngi la ioh ia ka prokram pyniaid iew ia u mar bala pynlong da ka Sorkar Meghalaya bad ngi la ioh ban phah ia u shynrai Lakadong ha ka sien ba nyngkong eh sha UK” ong ka Henna Shah jong ka Litter Farmer.
“Lyngba ka kompani jong nga, Dear Farmer, nga kwah ban kyrshan bad kyntiew ia kine ki nongrep ba rit b aria kiba mad ia ki jingtynjuh ba bun rukom na ka jingkylla ka suin bneng. Hadien ba duh noh ia ka paralok jong nga ha India namar ka jingshitom khlieh, nga la khmih bha ia ka jingdon ki briew ba shitom ha ka bor pyrkhat pyrdain ha India, ha kaba bun nga shem ba ki dei ki nongrep. Ka jingkylla ka suin bneng bad ka jingkhein poh ki dei kibaktah eh ia ki nongrep bad nga kwah ban leh eiei ban iarap ia ki” kala ong.
Ka Henna ka ong ba ka kompani kala siew tam ia ki nongrep da 15% na kaei kaba ki kwah ka jingsiew kata, ngim ju iadait dor bad ki (Kat kaba ki buh ban siew). “Ngi dang pyrshang ruh ban kynshew ia ki jingioh nong jong ngi ha ki kor ka juk ban ioh ai jingiarap ia ki nongrep kiba ju rep da ki rukom kiba rim” kala ong.
U shynrai Lakadong u dei uba la ioh ia ka GI tag kaba pynthikna ba tang u shynrai uba mih na ka shnong Lakadong, Meghalaya uba lah ban pyniaid iew kum u “Shynrai Lakadong”.
Ka Sorkar Meghalaya kala theh lut ia baroh ki jingiarap sha ki nongrep hapoh ka Mission Lakadong, kaba la sdang treikam naduh u snem 2018.
 u dei uba la pyniaid iew da ka kompani Dear Farmer na London, kaba treikam ha kawei ka shnong rit ha West Jaintia Hills, Meghalaya.){kind=link}