Shillong, Nohprah 09 : Ka longkmie ka jylla Kong Rephica Becky Pde sa shisien kala wanrah nam bad burom iaka jylla bad iaka jaidbynriew da ka jingioh khur iaka takma ksiar ha ka jingiakob mareh 30 Km Ultra Trail ha Basar Arunachal Pradesh kaba la long haka 5 tarik mynta u bnai.
Ia kane ka jingiakob mareh kaba la sdang na Bashar bad pynkut pat ha Eco Resort, la kaweh lama da u Myntri ka Sorkar Pdeng u Kiren Rijiju bad u Myntri Rangbah ka Arunachal Pradesh u Pema Khandu ha kaba kila ia mareh lang bad ki nongmareh na kylleng ki jylla jong ka ri kila wan ban iashimbynta ha kane ka jingiakob.
Ki nongmareh kila sei iala ka bor bad pynmih iala ka syep ka syar ha kaba kila mareh ha ki jaka ki ba noh bad kiba long riat bad ki jaka khlaw, ki lum ki wah hapdeng jong ka jingkhriat kaba la buh ia ki nongmareh ha ka jingeh.
Ka kong Rephica Becky Pde kala pyndep ia kane ka jingmareh da 5 kynta 45 minit ban ioh khur iaka takma Ksiar.
Ka Kong Becky kadei ka longkmie kaba ju leit iashimbynta ha kiba bun ki jingiakob mareh kiba la long ha kylleng ka ri India bad kala jop ruh bun tylli ki jingiakob watla kadei ka riewkynthei kaba la don khun don kti bad dang shen kala ioh iaka takma rnong haka jingiakob mareh kaba la tip kum ka 50 Km Eastern Himalaya Silk Route Ultra Run.
