Shillong Jymmang 25: Ka Bethany Hospital, Shillong kala ioh iaka jingithuh ne Certification na ka National Accreditation Board for Hospitals & Healthcare Providers (NABH) kum ka jaka ai jingsumar kaba lah ban ai iaka jingshakri kaba paka ia ki nongpang.
U Nongaiktien ka Bethany Hospital u Dr. Kyntiewlang Sanmiet ula pynpaw ia ka jingkmen ba ka Bethany Hospital, kala ioh pdiang iaka Certification na ka National Accreditation Board for Hospitals & Healthcare Providers (NABH) bad kane kala urlong namar ka jingtrei met bad mynsiem ha kaban ai ka jingsumar kaba paka ia ki nongpang bad ban don ruh ia ka kyrdan ha kaban sumar sukher bad ban ai jingshngain ia ki nongpang.
Ula ong, kane ka pyni ruh ba ka hospital kala lah ban pyndep ia ki kyndon pyrkhing kiba eh bad kala lah ruh ban pyndep ha kaban bud ryntih ia ki jingbthah jongka NABH ha kaban pynneh iaka kyrdan ha ka rukom sumar ia ki nongpang, ka jingshim ia ki lad jingiada bad ban bud ryntih ia ki kyndon ha ka rukom ai jingsumar.
“Ngi dap da ka jingkmen kaba khraw ban ioh iaka NABH Certification kaba long kaba kordor bha bad kane kadei namar ka jingtrei shitom ha ka jngialeh ban ai iaka jingsumar kaba pura bad kaba paka. Kane ka jingjop kadei ruh na ka jingtrei shitom met bad mynsiem jong ka kynhun baroh kawei khamtam ha kaban pynleit jingmut ia ka jingshngain bad ka bha ka miat jong ki nongpang haba ki ioh jingsumar” la ong u Dr Sanmiet.
