Shillong, March 27: Ka South Garo Hills District Cricket Association kala ioh rah ia ka nam kum ka lahduh jong ka Meghalaya Cricket Association’s U-14 Girls Inter District Cricket T20 Tournament 2023 kaba la long ha Nongstoin hynne ka Lah Sngi u Blei.
Ka SGH kala jop da 129 run iaka West Jaintia Hills DCA ha katei ka jingiakob ia kaba la wan ban sakhi da ki heh jong ka MCA.
Kitei ki kynhun kila ioh rung ha ka final da kaba long ki lahduh haka group stage.
Ka SGH kadei ka kynhun kaba marwei kaba mihkhmat iaka rilum Garo, katba kiwei pat ki kynhun ki kynthup ia ka WJH, Shillong Cricket Association, East Khasi Hills CA bad West Khasi Hills DCA.
Ka SGH kala jop lai tylli ki jingiakhun katba kawei pat ka jingiakhun la hap ban pynsangeh noh namar ka jingbym ailad ka suinbneng, katba ka WJH kala jop arsien bad rem noh haka SGH bad kawei ka jingiakhun la pynsangeh noh.
Hadien ba la jop iaka Toss, ka SGH kala tied nyngkong bad kala kamai 206 run bad hap tang 1 wiket ha ki 20 Over.
Ka Shreya R Marak kala kamai 18 run bad Out noh ha ka Carieyoka Lyngdoh kaba la ioh 1 wiket bad ai 68 run, katba ka Tempali Basumatary bad ka Kimtera D Sangma kila tied haduh ban da kut syndon khlem da Out.
Ka Basumatary kala kamai 81 run na ki 72 Ball ha kaba kala tied 10 tylli ki Four, katba ka Kimtera kala tied 56 run na ki 60 Ball bad tied 5 tylli ki Four.
Tang ka Anastesia S Shullai kala lah ban kamai 14 run naka bynta ka WJH, namar ka jinglah ki nongkawang bol ka SGH ban ialehkai bha.
Ka Shreya kala ioh 3 wiket bad ai 6 run, ka Dejiansua M Sangma kala ioh 3 wiket bad ai 20 run katba ka Kimtera kala ioh 3 wiket bad ai 20 bad ki nongtied jong ka WJH kila kamai 77 run bad Out lut baroh ha ka 18.2 Over.
Ka Kimtera D Sangma kala ioh ia ka nam Player of the Match.
Ki nongialehkai jong ka SGH kila ialehkai bha ha katei ka lympung iakob, ha kaba ka Basumatary kala kamai 223 run bad ka Kimtera kala kamai 193 run katba ka Shreya kala shim haduh 11 wiket bad kane ka lympung iakob kadei ka SGH kala lah ban ialehkai bha.
