Shillong, Jylliew 01 : Ka Khasi Students’ Union (KSU), Delhi Unit kala ioh ban pynlait ia arngut ki kynthei na ri-lum Jaintia, kiba shah pynbor ban iaid kam awria ha Delhi hadien ka jingshah pynngop ban aikam ia ki ha kawei ka hotel.
Kat kum ka kyrwoh na ka KSU-Delhi Unit la iathuh ba kane ka jingjia kala jia ha ka 31 tarik Jymmang hadien ba ka Seng kala ioh pdiang ia ka jingkyrpad ban iarap kyrkieh na kine kine ki samla kynthei, kiba la shah set kut ha ka briew kaba wan ialam iaki sha Delhi.
Ka KSU mar mar kala pyntip ia kane ka jingjia sha ki Pulit ka Delhi bad pan jingiarap ban ioh pynlait ia kine ki thei samla.
Ka KSU ka iathuh ba ia kine ki arngut ki thei samla la wan ialam ia ki sha Delhi da kawei ka briew kaba kular ban pynioh kam ha kawei ka Hotel. Hynrei hadien ba poi ha Delhi, la kynnoh ba kila shah pynbor ban rung ha ki kam khaii met.
Ka iathuh ba haba kine ki thei samla kila kyntait ia kane ka kam, la kynnoh ba kane ka briew kaba wan ialam sha Delhi kala dawa ban siew biang ia ka pisa ba ka pynlut ha ka leit ka wan jong ki bad kynnoh ba kala knieh ruh ia ki mobile phone jong ki. La kynnoh ba kane ka briew kam shym la shah ia ki ban mih na katei ka jaka tad haduh ban da siew ia ka pisa ba ka pynlut na ka bynta jong ki.
Ka KSU ka pyntip ba ki Pulit ka Delhi kila shimkhia mar mar ia kane ka kam bad kila lap bad ioh bat ia kane ka briew na ka bynta ka jingtohkit. Ka iathuh ba ha ka jingtohkit, kane ka briew kala kyntait ia baroh ki jingkynnoh bala mudui pyrshha ia ka haba kam ruh ba kine ki arngut kila wan hi da ka monsngew bha lajong sha Delhi ban wadkam bad ba kala siew ia ka bai leit bai wan jong ki ban iarap ba kin iohkam.
La iathuh ba kane ka briew kala kyntait ruh ba ka don bynta ha ka jingpynbor lane jingthmu ban pynryng ia ki ha ka kam khaii met.
Hadien kane ka jingkem, ki Pulit kila bthah ia kane ka briew ba kan pynphai noh ia ki mobile phone bad ia kine ki samla la aiti noh ha ka jingiada bad jingiarap jong ka KSU Delhi Unit.
Na ka liang ka KSU kala pynbeit ruh ia ki lad jingiarap ban lah pynpoi suk ia ki sha la iing. La iathuh ba ki bahaiing jong kawei na kine ki samla, kala phah ia ka pisa bai tiket liengsuin ba kan wan phai shala iing.
Ka KSU-Delhi Unit ka kyntu ia baroh kiba wad kam ba kin long kiba husiar bha haba paidnag ia kino kino ki jingkular kam na ki briew bym lah ban shaniah bad ba kin pynshisha bha ia ka jingshisha jong kine ki jingkular shuwa ban leit sha kiwei pat ki jaka.
, Delhi Unit kala ioh ban pynlait ia arngut ki kynthei na ri-lum Jaintia, kiba shah pynbor ban iaid kam awria ha Delhi hadien ka jingshah pynngop ban aikam ia ki ha kawei ka hotel.){kind=link}