Nongpoh, Risaw 11: Ki pulit ka Ri Bhoi District ki la ioh ban pynlait im ia kawei ka heprit kaba la kynnoh shah rahbor bad jah klep na la ka iingsah naduh ka 7 tarik u Risaw, kata hadien 3 sngi ba kane ka heprit ka la jah klep na la iing.
Katkum ka khubor pulit, la iathuh, ba ha 7 tarik u Risaw ki bahaiing jong katei ka heprit (ba la buhrieh kyrteng) ki la ujor halor ka jingjah klep jong katei ka heprit bad marmar ki bor pulit ki la rejistar case bad sdang ban tohkit halor katei ka jingujor.
La iathuh ruh, ba ha ka jingtohkit kaba bniah bha, ha ka 9 tarik Risaw ki Pulit kila lapdien ia kane ka Heprit ba kala poi sha khappud ka India-Nepal.
Ki Pulit kila pyntip mar mar sha ki Pulit ka Nepal bad ka Raniganj Police Outpost kaba hap hapoh ka Kharilari PS, Darjeeling, West Bengal, kila ioh pyllait ia kane ka heprit bad ioh ban kem ia uwei u briew uba suba donkti ban rahbor.
Ki Pulit ka Ri-Bhoi kila hiar shimti ia kane ka heprit bad la wan pynpoi sha Jylla ban pynlong ia ka jingtohkit kaba bniah bad ban aiti noh sha ki bahaiing hasem.
