Guwahati, Nailur 09 : Ki Pulit ka Railway Protection Force (RPF) ka Northeast Frontier (NF) Railway, kila ioh ban pyllait ia 44 ngut ki khynnah bad 3 ngut ki kynthei ha ka jingkhynra ha ki rel bapher bapher bad ki railway station hapdeng ka 16 tarik Nailur haduh 31 tarik Nailar, 2024.
Ka RPF kala pynlong ia ka jingkhynra kaba jur bha ia ka jingkhaii briew bad ioh pyllait ia ki khynnah bad ki kynthei na ka tyrsim jong ki kynhun nongkhaii briew.
Ha kawei na ki jingioh pyllait, ka kynhun RPF ha Kishanganj Railway Station kila ioh bat ia 3 ngut ki khynnah ba phet na iing ha ka 16 tarik Nailar katba kawei ka kynhun ha Dibrugarh Railway Station kila ioh bat ia 4 ngut ki khynnah bap het na iing myn ha ka 24 tarik Nailar.
Ha baroh kine ki jingjia, ki Pulit kila aiti noh ia kine ki khynnah sha ka Childline ba kan sumar bad ai jingiada ia ki.
Ka RPF ha ryngkat ka jingiatreilang bad ka Government Railway Police (GRP) bad ka Childline, kila pyni ia ka jingtrei shitrhem ban tehlakam ia ki kam khaii ia ki khynnah ha une u 2024.
Tang naduh u Kyllalyngkot haduh Naitung, kila ioh pyllait haduh 456 ngut ki khynnah bad 42 ngut ki kynthei bad ia kine baroh la aiti noh sha ki bor khmih ba kin leh ia kaba donkam.
