Guwahati Naitung 08: Ki pulit ka Guwahati kila ioh pyllait im ia arngut ki khynnah kynthei na kawei ka iing die met kaba don ha Bihar.
Kila don 4 ngut kiba la shah kem halor ka jingkhaii met ia kitei ki kynthei, kiba kynthup ia u Tanweer Alom (35), khun jongu (L) Aftab Alom, na Gulab Bagh Zero Mile, Eurnia, Bihar, u Idrish Ali (27), khun jongu Jaharuddin Ali basah ha Satrakonara, Baghbar, Barpeta, ka Khairun Nesa (30) ka kurim jongu Ekbal Ali ba sah ha Panjipara, Hanskunda, Uttar Dinajpur, West Bengal bad u Sikandar Ali (48), khun jongu (L) Sukur Ali, ba na Ganeshpara, Fatashil Ambari, Guwahati.
Katkum kajingujor kaba la ujor ha Bhangagarh Police Station, ar ngut ki khynnah kynthei kila jah klep naduh ka 29 tarik u Jylliew. Ka kmie jong kawei ka khynnah kynthei kala leit ujor sha ki pulit ba ka khun ka jongka kaba dang don 18 snem ka rta kala pynbor ban ai mobile phone ia ka hynrei haba kam shym la ioh, kumta kala leit sha ka iingsah jong kawei pat ka paralok kynthei bad kitei baroh arngut ki kynthei kila jah klep noh.
U City Police Commissioner u Diganta Barah ula pynpaw ba ha ka jingtohkit, la don uwei uba la phone ia u hynmen jong kawei na kitei ki kynthei bad ula dawa T.30,000 ban pyllait noh ia ka bad ha ka jingbuddien la shem ba ia katei ka phone la phone naka jaka kaba don ha Purnia, Bihar, kaba la iarap ia ki pulit ban lap bad ban ioh pyllait im ia kitei ki arngut ki kynthei.
“Kawei ka kynhun jong ki pulit kala leit sha Purnia, Bihar, ha kaba kila iohkem ia u Tanveer Alom, uab la phone bad dawa pisa bad kila ioh ban pyllait im ia kitei ki arngut ki kynthei” ong u Barah.
“Kitei ki arngut ki kynthei kila don jingthmu ban leit sha Delhi ha ka por ba u Sikandar Ali ula iakynduh ia ki ha Paltanbazar Railway Station. Ula pynkohnguh ia ki ba un iarap ban pynpoi ia ki sha Delhi hynrei ula leit ban aiti iaki ha u Idrish Ali uba na Basistha. Kumta u Idrish Ali bad ka kurim ka jongu, Babli bad ka jingiatrelang bad Khairun Nessa na Panjipara, West Bengal, kila kit noh ia kiteik I kynthei sha Siliguri da ka bos bad kila die noh ha u Akbor uba na Panjipara, Bihar, ha ka dor T.1,10,000 bad u Akbor ula leit ban aiti noh ia kitei ki kynthei sha Tanveer Alom, ula phah ia ki ban leit die met jubor hapoh ka ïingdie met kaba don ha Rawta, Bihar” ula iathuh.
“Hadien ba la ioh ia ki sakhi bad ki sabut kiba biang pyrshah ia ki briew kiba la donkti ha katei ka kam sniew, kumta ki pulit kila kem noh ia u Idrish Ali na Pilinkata, Basistha bad ia u Sikandar Ali na Paltanbazar Railway Station,” la iathuh u Barah.
Ula pyntip ruh ba ka jingtohkit ka dang iaid shakhmat bad khamtam ha kaban thwet ia ka kurim jong u Idrish Ali kaba la phet rieh mynta.
