Shillong, Nohprah 02 : Ka Sorkar Jylla kala ioh ban pynlait ia 24 ngut ki khynnah ba hapdeng 8-13 snem na Jylla, kiba shah ialam ban leit pule ha Karnataka.
Kine ki khynnah ki kynthup ia 10 ngut kiba dei na East Khasi Hills, 7 ngut na East Jaintia Hills, 6 ngut na West Jaintia Hills bad 1 na West Khasi Hills, ia kiba la kular ba kin ioh ia ki jingpule ei nalor ka hostel.
Kane ka jingjia kala paw pyrthei hadien ba ka Chairperson ka Child Welfare Committee ka Chikkaballapur, Karnataka, kala ai jingtip sha ka Director ka Tnad Social Welfare myn ha ka 2 tarik Nailar, 2025, ba ki don 25 ngut ki khynnah na Meghalaya kiba la ioh ban pyllait na ka Sowmya Kesanupallii Student Hime, Peumale, Chikkabalapur District.
Ka Chairperson ka Meghalaya Child Welfare Committee kala pynlong ia ka video conference bad kine ki Khynnah ban sngewthuh kham bha ia kaei kaba jia ba man. Ia kine ki Khynnah la phah sha Karnataka da ka Leisynshar Cultural Society ha u bnai Jylliew.
Ka Chairperson ka Meghalaya State Commission for Protection for Child Rights (MSCPCR) Agatha K Sangma ka pyntip ba ka Leisynshar Cultural Society, ka dei ka seng kaba treikam be-ain bad ka Sorkar kala dep ai dak iong (blacklist) ia kane ka seng.
“Ka DC kala pynmih ia ka hukum ba ai dak iong (blacklist) ia ka Leisynshar Cultural Society bad pynsangeh syndon ia ka jingtreikam jong ka” ong u Agatha haba iakren bad ki nongthoh khubor ha ka sngi Ba-ar.
Ka Deputy Commissioner kala pynmih ia kane ka hukum hadien ka jingujor jong ka MSCPCR, kaba lam sha ka jingkhang syndon ia ka jingtreikam jong kane ka seng.
“Mynta, kim lah shuh ban nang treikam kum ka Society” kala pynpaw.
Haba iadei bad kine ki khynnah, ka Agatha kala ong “Ia ka jingpule jong kine ki Khynnah yn sa shimkhia ka Sorkar bad yn sa pynrung skul ia ki ha ka snem pule ban wan. Ka Sorkar bad ka Tnad Social Welfare kin sa khmih ia kane ka bynta”.
Ka Agatha kala pynpaw ia ka jingsngewkhia halor ka jingphah ia ki khynnah sha kiwei ki Jylla ba kin leit pule skul, kaba ju lam bunsien sha ka jingleh bein da ki seng kiba kam ban plie lad plie lynti ia ki.
Ia kine ki Khynnah yn pynsah mynta shipor ha ka Girls Children’s Home kaba don ha Mawkasiang, Shillong.
