Guwahati, Nailar 23 : Ka tnat pahara Railway Protection Force (RPF) jong ka NF Railway ka la ioh ha ka jingjop hadien ba ka la lah ban pyllait im ia 22 ngut ki khynnah kiba dang hapoh rta lem bad kawei ka longkmie ha ka por ba kila pynlong ka jingkhynra kaba ki ju leh naduh ka 17 haduh ka 19 tarik mynta u bnai hapoh ki rel bad ki steshon rel bapher bapher ha ka thain shatei lammihngi (Northeast) jong ka ri.
Ki dkhot ka RPF kila ioh ruh ban kem noh ia uwei u briew uba donkti ha ki kam khaii briew ha kane ka jingleit khynra, ong ka tnat NF Railway.
Ha kane ka jingjia kaba la jia ha ka 19 tarik mynta u bnai, ka tnat pahara RPF na Katihar bad RPF/Post/Katihar(East) ryngkat lang kila pynlong ka jingkhynra hapoh ka rel kaba don ia u no. 04653 (New Jalpaiguri – Amritsar Humsafar Express) ha Katihar station, ong katei ka tnat.Ha kane ka jingkhynra, kila lapdien ia sawngut ki khynnah shynrang kiba dang khynnah nalor uwei uba la rangbah.Ha ka jingtohkit, la shem ba une u briew u don ia ka jingthmu ban ialam ia kine ki khynnah na ka bynta ban pyntrei.
Ia une u briew la ialam noh da ki bor pulit, bad hadien ia kine ki khynnah ba la ioh ban pyllait kumjuh ia une u briew la aiti noh sha u Officer-In charge/Government Railway Police/Katihar ban leh ia kaba donkam.
Ha kawei pat ka jingjia kaba la jia ha ka 18 tarik mynta u bnai, ka kynhun ki RPF ka New Tinsukia katba ki dang pynlong ka jingtalasi kila ioh ban pyllait ia kawei ka khynnah kynthei napoh ka steshon rel New Tinsukia Railway Station.Hadien la aiti noh ia kane ka khynnah sha ka Childline na ka bynta ka jingshngain bad ban leh ia kaba donkam.
Ha ka 17 tarik mynta u bnai, ka kynhun CIB na ka RPF/Guwahati ryngkat bad ki dkhot jong ka Railway Childline kila pynlong ka jingkhynra hapoh Guwahati station ha kaba kila ioh ban pyllait ia laingut ki khynnah shynrang.Ha kane ka juh ka sngi, ka kynhun RPF ka Guwahati kala ioh ruh ban pyllait ia kawei ka longkmie kaba la jah rngai katba ki dang pynlong ka jingtalasi hapoh Guwahati station.
Hadien ia kine ki khynnah bad ia ka longkmie la aiti noh shapoh Railway Childline bad ruh sha kiba haiing hasem hadien ba la dep ban pynthikna halor ki jingshisha baroh.
