Shillong, Lber 18: Ka Khasi Students’ Union (KSU) Delhi Unit ryngkat bad ka Special Police Unit for North East Region (SPUNER), kila ioh ban pyllait im ia arngut ki khynnah kynthei Khasi Pnar na ki kti jongki nongkhaii briew kiba kular thok ban aikam aijam.
Ka KSU kala pyntip ba kine ki arngut ki khynnah kynthei Khasi kila shah ngat ha ka jingriam jong ki nongkhaii briew kiba thok ia ki da kaba kular ban ai kam.
Kawei ka khynnah kadei kaba dang don 15 snem ka rta bad kawei pat kadei kaba don 18 snem ka rta kiba na East Jaintia Hills, Meghalaya.
Ka KSU kala pynpaw ba katkum ka jingtip bala iohlum, la ialam ia kine ki khynnah sha Delhi da iwei i paralok iba dei hi na Meghalaya iba trei ha Delhi, khlem ka jingtip ne ka jingbit ki kmie ki kpa bad la pynbiej ia ki da kaba kular ban ai kam bylla ha ki iing briew.
Hynrei ynda la poi ha Delhi, la ialam pynban ia kine ki khynnah ha kawei ka Spa ha Haryana bad la pynbor ia ki ban rung sha ka kam die met. Namar ka jingsheptieng, kine ki khynnah ki la ioh ban phone sha la iing bad ka longiing jong kine ki khynnah kala pyntip mardor bad pan jingiarap na ka KSU Delhi Unit.
Kumta ka KSU Delhi Unit kala pyntip mardor sha ka kynhun SPUNER bad lyngba ka jingiatreilang kila lah ban lap bad pyllait im ia kine ki khynnah na katei ka jaka ha Haryana.
Ka KSU Delhi Unit ka phah ka jingsngewnguh sha baroh ki dkhot kiba la shim bynta ha kane ka kam ban iada ia ka jingim briew.
Ka KSU ka pynpaw ka jingsngewnguh kaba kyrpang ia i Sabrina, ARC Meghalaya House, namar ka jingiarap ba ryntih bad sha u Nabam Gungte, Joint CP, SPUNER halor ka jingshimkhia ka jongki bad ka pynpaw ruh ia ka jingsngewnguh ia ka jingshlur bad jingtrei shitom jong ka kynhun Rescue Team jong ka SPUNER kiba la don ha madan ban pynshngain ia kine ki khynnah kynthei.
“Kane ka jingjia ka long ka jingmaham kaba khraw ia ka jingma kaba ki samla jong ngi ki lah ban iakynduh haba ki leit wad kam wad jam shabar,” la ong ka Samla Marbiang Khongwir, President ka KSU Delhi Unit bad ka bynrap, “Ngi kyntu ia baroh ki kmie ki kpa bad ki samla ban long kiba phikir bad kiba sumar bha na ki jingpynshoi ki nongthok kiba kular ban ai kam. Ka KSU ka iengskhem beit ban iada ia ka bit ka biang jong ka jaitbynriew Khasi ha Delhi-NCR.”
Ka Union ka dang iatreilang bad ki bor sorkar ban pynbiang ia ka jingpynshngain bad ban pynpoi biang ia kine ki khynnah kynthei sha la ki longïing hapoh Meghalaya.
Ka Seng ka ai khublei ruh ia u MLA Bah Kyrmen Shylla uba la ai jingiarap pisa na bynta ka bai Liengsuin ne Flight ban pynpoi ia kine ki khynnah sha ka Jylla.
 Delhi Unit ryngkat bad ka Special Police Unit for North East Region (SPUNER), kila ioh ban pyllait im ia arngut ki khynnah kynthei Khasi Pnar na ki kti jongki nongkhaii briew kiba kular thok ban aikam aijam.){kind=link}