Guwahati, Risaw 07: Ka riew ieit mariang ba pawkhmat ka Assam ka Purnima Devi Barman kala ioh pdiang ia ka khusnam ‘World Female Ranger Award 2022’ halor ka jingshakri bad ka jingkut jingmut ka jong ka na ka bynta ban pynneh pynsah ia ka mei mariang bad ki jingthaw kiba don hapoh jong ka.
“Nga sngew burom bad sngewkmen shibun ban ioh pdiang ia kane ka khusnam ‘World Female Ranger Award 2022.’Nga sngew burom shibun halor ka jingithuh ia ka jingdonkam ban aijingiada ia ki sim Hargila kiba la jan duhjait kumjuh ia kiwei pat ki jait jingthaw kiba iasyriem hapoh Assam,” ong ka Barman hadien ka jingioh pdiang ia kane ka khusnam.
“Ka jingioh pdiang ka jonga Nga ia kane ka khusnam bad ka burom kan ym long kaba pura khlem ka jingithuh ia ki jingtrei jong ki kynthei ranger kiba shlur kumjuh ki bor pahara khlaw na kylleng ki ri ka pyrthei.Ka jingiadon bynta ba hakhmat eh jong ki kynthei ha kaban aijingiada ia ka mei mariang bad ia ki jingthaw kiba don hapoh jong ka ki lah ban wanrah ia ki jingphylla kumba la leh da ki kynhun aijingiada na ka bynta kine ki sim Hargila ki jong ngi,” ong ka Barman.
“Nga kyrmen ba ngin lah ban iatreilang kumjuh hapdeng ki kynthei bad ki shynrang na ka bynta ban pynneh pynsah ia ka mei mariang bad ki jingthaw kiba don hapoh jong ka. Ki dang don shibun bah ki jingeh bad nga la kut jingmut ban iakhun pyrshah ia ki bad ban ioh ia ka jingjop,” kala ong shuh shuh.
Ka Purnima Devi Barman ka dei ka conservationist and biologist kaba la pynkylla ia ki jingmut jingpyrkhat jong ki briew ha kaba iadei bad ka kynhun jong kitei ki jait sim ba la tip kum ki Greater Adjutant Stork.La ju shim ia kine ki jait sim kum ki nong wanrah jingpang, kiba wanrah ia ka sniew ka smeh, hynrei na ka liang ka Purnima ha ryngkat ka kynhun ba la tip kum ka ‘Hargila Army’ jong ka kila lah ban iarap ban pynkylla ia kine ki jait sim kum ki jingthaw kiba pawkhmat kiba long ruh shibynta jong ka kolshor hapoh Assam.
Ka Barman kala thaw ia katei ka kynhun ‘Hargila Army’ naduh kaba rit eh, hynrei mynta kane ka kynhun ka don haduh kumba 10,000 ngut ki kynthei kiba iatrei ryngkat ryngkat ban aijingiada ia kine ki jait sim Greater Adjutant Stork kiba la sdang duhjait.
Kane ka kynhun ka ju peitngor ia ki skum ne ki jaka shong jong kine ki sim bad ban khanglad na ki nongsiat mrad bad na kiwei pat ki rukom kiba buh jingma ia kine ki sim.
Nalor kata ka Barman kala thaw ruh ia ki skum sim bala pynwandur hi kaba dei ruh kaba nyngkong tam ha ka pyrthei ha kaba kine ki sim ki lah ban puh khun hapdeng ka jingshngain, kata shibynta ban weng ia ki jingeh kaba kine ki sim ki iakynduh ha kaba iadei bad kane ka bynta.
Ia katei ka khusnam la aiti da ka kynhun NGO jong ki ri ka pyrthei kaba don ia ka jaka treikam hapoh UK kaba kyrteng, ‘How Many Elephants.’
Ka nongseng jong kane ka seng ‘How Many Elephants,’ ka Holly Budge kala plie ia kane ka jingai khusnam ba la tip kum ka ‘World Female Ranger Award’ ha une u snem ba la dep ha kaba la pynlong ruh ia ka ‘World Female Ranger Week’ naduh ka 23 haduh ka 30 tarik u bnai Jylliew.Ka Holly lem bad ka kynhun jong ka kila ithuh ia kumba 5500 ngut ki ranger kynthei na kylleng ka pyrthei.
“Ngi sngewkmen shibun ban ai ia kane ka jingithuh na ka bynta ka Purnima lyngba kane ka khusnam, kata nalor ka jingiarap pisa bala bei da ka Globe Foundation.Ka long ka briew kaba ai mynsiem na ka bynta ki kynthei ha ka jingialeh ban iada ia ka mariang bad ki mrad khlaw, ban kyntiew ia ka imlang ka sahlang bad ban aibor shuh shuh ia ki kynthei,” ong ka Holly.
