Nongpoh, Kyllalyngkot 27: Ki 2ngut ki khynnah kiba la tip kyrteng kum U Forme Khongji na ka Shnong Umkrem, East Khasi Hills bad u Wallambok Rani na ka Umden Arka na Ri Bhoi Distric,t ki la ioh pdiang ia ka khusnam Riewshlur na ka Indian Council For Child Welfare (ICCW) New Delhi .
Ka jingioh jong kine 2 ngut ia kane ma khusnam Riewshlur ka dei halor ka jingpynlait im ia ki briew kiba ngap jyllop ha ki wah.
Ia katei ka khusnam la sam ha ka 25 tarik u Kyllalyngkot shi sngi shuwa ka jingrakhe ia ka Republci Day bad ba la sam ia ki da u U Vice- Admiral B.S Randhawa, uwei na ki heh shipai Duriaw bad la don ryngkat lang ruh u Air Marshall, u Sumit Mukherji PVSM SC VCM, Major General, VIKRAM DEV Dogra, AVCM.
Baroh kiba la ioh pdiang ia katei ka khusnam ki long 56 ngut na ki 17 tylli ki jylla.
Ka long ka burom kaba khraw ia ka Ri hi baroh kawei ba dang don kum kine ki Riewshlur kiba len ialade ban pynlait im ia kiwei bad kum ki nongshong shnong ka ri India ki dei ban bud ia ka nuksa jong kine ki riew shlur ban len lade na ka bynta kiwei bad na ka bynta ka ri lajong, ong u Major General VIKRAM DEV Dogra ha ba ai jingkren kum u wei na ki kongsan ha katei ka jingialang pynkup burom.
Kine ki ar ngut ki heprit na Meghalaya mynta ka sngi ki la wan phai ing noh hadien ba la ioh pdiang ia katei ka khusnam riewshlur bad hadien ba la poi ha Nongpoh, la pynkup burom ruh ia ki da ka Hills Farmers Union na Ri Bhoi, ha ka jingdon ka Kong Jecinta Lyngdoh kum kawei na ka dkhot ka seng ryngkat kiwei ki dkhot bad ruh ha ka jigndon lang u Bah Alfonse Kharsyntiew uba la synran ia kine ki ar ngut ki Heprit ha Nongbah Delhi bad haduh ba ki la wan phai biang sha la ing.
